„კულასა“ და „ბატონოს“ დამფუძნებელი, ივანე გოგლიძე, რომელიც ფალსიფიცირებული თევზის კონსერვების წარმოება-გასაღების ბრალდებით დააკავეს, ნახევარი მილიონი ლარის გირაოს სანაცვლოდ გათავისუფლდა.
„ინტერპრესნიუსს“ ამის შესახებ ინფორმაცია მისმა ადვოკატმა, კახა წერეთელმა დაუდასტურა.
„8 აპრილს გათავისუფლდა. უძრავი ქონების უზრუნველყოფით ნახევარი მილიონი ლარის ოდენობის გირაოს სანაცვლოდ. ჩვენ მივმართეთ სასამართლოს, ვინაიდან გამოძიება ფაქტობრივად დასრულებული იყო, ჩვენც წარვადგინეთ მტკიცებულებები და მიგვაჩნდა, რომ არ იყო აუცილებლობა მისი პატიმრობაში ყოფნის. მას დანაშაული არ უღიარებია, უბრალოდ იმ პროცედურული საფუძვლიდან გამომდინარე, რომ ყველა მტკიცებულება შეგროვებული იყო, სასამართლო დაეთანხმა ჩვენს მოთხოვნას“, - განაცხადა წერეთელმა.
ცნობისთვის, ივანე გოგლიძეს ბრალდება სისხლის სამართლის კოდექსის 197-ე მუხლის მესამე ნაწილით წარედგინა, რაც საკვები პროდუქტის ფალსიფიკაციას გულისხმობს, რასაც შეეძლო საფრთხე შეექმნა ადამიანის სიცოცხლისთვის და ჯანმრთელობისთვის. აღნიშნული ქმედება სასჯელის სახედ და ზომად 5-დან 7-წლამდე თავისუფლების აღკვეთას ითვალისწინებს.
ფინანსთა სამინისტროს საგამოძიებო სამსახურის ინფორმაციით, გამოძიებით დადგინდა, რომ ბრალდებულმა, 2025 წელს, სახელმწიფო ტენდერის საფუძველზე გაფორმებული ხელშეკრულების ფარგლებში, 380 792 ლარის ღირებულების 24 177.3 კილოგრამი თევზის კონსერვი მიაწოდა სასაზღვრო პოლიციასა და შპს „სახელმწიფო კვებით უზრუნველყოფას“.
როგორც ფინანსთა სამინისტროს საგამოძიებო სამსახურში განმარტავენ, აღნიშნული პროდუქცია განკუთვნილი იყო საქართველოს შინაგან საქმეთა და თავდაცვის სამინისტროების თანამშრომელთა კვებისთვის.
