სასამართლო რეფორმასთან დაკავშირებით შექმნილ სამუშაო ჯგუფის შეხვედრას ვინც არ დაესწრო, მათი მხრიდან ფასადურობაზე საუბარი არასერიოზულია, ეს ხალხი ქვეყნის პერსპექტივას მაგიდას უყირავებს, – ამის შესახებ საქართველოს პარლამენტის იურიდიულ საკითხთა კომიტეტის თავმჯდომარე ანრი ოხანაშვილმა განაცხადა.
ოხანაშვილის თქმით, ისინი ბოიკოტს უცხადებენ არა „ქართულ ოცნებას“, არამედ ევროპულ პერსპექტივას.
როგორც ოხანაშვილმა აღნიშნა, ამ შანსის ხელიდან გაშვება უდრის იმას, რომ ბოიკოტს ევროპულ პერსპექტივას უცხადებ.
„რამდენიმე თვის წინ პოლიტიკურ პარტიებთან შევთანხმდით, რომ „ქართული ოცნება“ დადებდა და მოამზადებდა დოკუმენტს, რომელიც სასამართლო სისტემაში გატარებული რეფორმის სიტუაციური ანალიზი იქნებოდა. 200-გვერდიანი დოკუმენტი წარმოდგენილია, სადაც ასახულია ქართული მართლმსაჯულების ინსტიტუციური განვითარება 2013 წლიდან დღევანდელ დღემდე. მასში საუბარია თითოეულ განხორციელებულ ცვლილებაზე, ყველა გატარებულ რეფორმაზე, ყველა რეკომენდაციაზე. რეკომენდაციების უმეტესობა შესრულებული გვაქვს. თვალსაჩინოა პროგრესი, რაც სასამართლო სისტემამ განიცადა და შეუძლებელია ამ ფაქტებს კონტრფაქტებით შეეწინააღმდეგო. ამ ყველაფრის გათვალისწინებით მზად ვართ, ოპონენტებთან ერთად ვიმსჯელოთ. მომავალ კვირას შევიკრიბებით და დოკუმენტებზე მოსაზრებებს გავცვლით. სამუშაო ჯგუფის ფარგლებში წარმოდგენილია მხოლოდ ორი დოკუმენტი. ჩვენ და „მოქალაქეებმა“ წარმოვადგინეთ დოკუმენტი. „ლელომ“ არათუ დოკუმენტი წარმოადგინა, შეხვედრაზეც არ მოვიდნენ. არ ვიცი, ოპონენტები რას გულისხმობენ მოჩვენებითში, მათთვის რა არის გამოწვევა. ამაზე ვერბალურად კი არ უნდა ვისაუბროთ, დოკუმენტები უნდა დადონ. ვინც დღევანდელ შეხვედრას არ დაესწრო, მათი მხრიდან ფასადურობაზე საუბარი არასერიოზულია. ფაქტობრივად, ეს არის ხალხი, ვინც ქვეყნის პერსპექტივას მაგიდას უყირავებს. ისინი ბოიკოტს უცხადებენ არა „ქართულ ოცნებას“, არამედ ევროპულ პერსპექტივას. ამ შანსის ხელიდან გაშვება იმას უდრის, რომ ბოიკოტს ევროპულ პერსპექტივას უცხადებ. ყველაფერს გავაკეთებთ, რაც ჩვენზეა დამოკიდებული. ამ პროცესში არმონაწილეობით დისკრედიტაციას უკეთებენ 12 რეკომენდაციას“, – განაცხადა ანრი ოხანაშვილმა.
