ქართველი თავისუფალი სტილით მოჭიდავე გენო პეტრიაშვილი (-125კგ) ოლიმპიური ჩემპიონია.
შეჯიბრების ფინალში პეტრიაშვილმა მსოფლიოს ორგზის ჩემპიონი, 23 წლის ირანელი სპორტსმენი ამირ ჰოსეინ ზარე 10:9 დაამარცხა და საქართველოს პარიზის ოლიმპიადაზე მეხუთე მედალი მოუტანა.
30 წლის ქართველმა ფალავანმა ოლიმპიადაზე გამოსვლა გუშინ დაიწყო. მერვედფინალში უკრაინელი ხოციანივსკი 11:0 დაამარცხა, მეთხედფინალში პოლონელ რობერტ ბარანს 9:2 სძლია, ხოლო ნახევარფინალში აზერბაიჯანის სახელით გამომსვლელ გიორგი მეშვილდიშვილს 7:0 აჯობა.
აქამდე პეტრიაშვილი რიოს ოლიმპიადის ბრინჯაოსა და ტოკიოს ოლიმპიადის ვერცხლის მედლებს ფლობდა. ის მსოფლიოს სამგზის და ევროპის ორგზის ჩემპიონიცაა.
შეგახსენებთ, რომ საქართველოს დელეგაციას პარიზის ოლიმპიურ თამაშებზე აქამდე ოთხი მედალი ჰქონდა. ოლიმპიური ჩემპიონი ლაშა ბექაური გახდა, ვერცხლის მედლებს ილია სულამანიძე და ტატო გრიგალაშვლი დაეუფლნენ, ხოლო ლაშა გურულმა ბრინჯაო მოიპოვა.
