ყველაფერი მიუთითებს, რომ საქართველოში არჩევნები სწორად არ წარიმართა, – ამის შესახებ შვედეთის პრემიერ-მინისტრმა, ულფ კრისტერსონმა განაცხადა.
„უკიდურესად შემაშფოთებელია, რომ რუსული გავლენის ქვეშ მყოფი მთავრობა ყველაფერს აკეთებს, შეაჩეროს ევროპასთან დაახლოება, რაც ხალხის ნებაა. ამას უნდა მოყვეს შედეგები. ჩვენ არ შეგვიძლია, ვითანამშრომლოთ ხელისუფლებასთან, რომელიც ეწინააღმდეგება ყველაფერს, რისთვისაც ჩვენ ვდგავართ“, – განაცხადა ულფ კრისტერსონმა.
კრისტერსონი ასევე ეხმაურება უნგრეთის პრემიერ-მინისტრის, ვიქტორ ორბანის განცხადებას, რომ არჩევნები საქართველოში იყო თავისუფალი და დემოკრატიული.
„ის არ საუბრობს ევროპის ქვეყნების სახელით, არ საუბრობს შვედეთის სახელით, შესაძლოა, ის საუბრობს რუსეთის სახელით, მაგრამ ის არ საუბრობს ჩვენი, დანარჩენების სახელით“, – აღნიშნა კრისტერსონმა.
შვედეთის პრემიერ-მინისტრი აღნიშნავს, რომ მოლდოვაში ცოტა ხნის წინ ჩატარებული არჩევნებიც არ წარიმართა სწორად.
„ყველაფერი ასევე მიუთითებს მასშტაბურ დარღვევებზე. ეს არის ორი ქვეყანა, რომელიც ახლა დგას ზუსტად რუსულ გავლენასა და ევროპულ, დემოკრატიულ გავლენას შორის მიმდინარე ომის შუაგულში. მე ვიტყოდი, ეს უკიდურესად საგანგაშოა“, – აღნიშნა პრემიერმა.
ჟურნალისტმა ასევე კითხვა დაუსვა, ეშინია თუ არა შვედეთს, რომ საქართველოში, შესაძლოა, ბელარუსის მსგავსი ვითარება მიიღონ, რაზეც კრისტერსონმა აღნიშნა: „დიახ, რუსეთის ამბიციაა, შეაჩეროს ევროპასთან დაახლოება, ეს დიდი ხანია, მიმდინარეობს. ეს არ არის ომი ტრადიციული სამხედრო ფორმით, მაგრამ ეს არის ჰიბრიდული ომი ამ ქვეყნების წინააღმდეგ, რაც მას ნამდვილად საშიშს ხდის“.
