გოჩა მირცხულავა: სუსი „ქართული ოცნების“ პოლიტიკური ინსტრუმენტი ხდება
03.04.2025 ნახვები: 477
"ბიძინა ივანიშვილი შესაძლოა, ყველა თანამდებობას შეელიოს, მაგრამ შს მინისტრის თანამდებობას არ შეელევა. იქ თავისი კადრი უნდა ჰყავდეს!"
„ახალი თაობის“ კითხვებს ანალიტიკოსი გოჩა მირცხულავა პასუხობს.
- გოჩა, როგორ აფასებთ ბოლო პერიოდის პოლიტიკურ პროცესებს? რას იტყვით გუშინდელ საკადრო ცვლილებებზე? ანრი ოხანაშვილი სუსის უფროსად. რას ნიშნავს ეს ცვლილებები? ოქტომბერში ვადა ეწურებოდაო, ირაკლი კობახიძემ.
- კი, მაგრამ ოქტომბრამდე არცთუ ცოტა დროა, თანაც წინ არჩევნებია. მინდა გითხრათ, რომ მიუხედავად იმისა, ქვეყანაში რა პოლიტიკური პროცესები ვითარდებოდა, ლილუაშვილი ამ თანამდებობაზე ერთ-ერთი ყველაზე მშვიდი და გაწონასწორებული ფიგურა იყო. შეგვიძლია ვთქვათ, ადეკვატური. ის რეპრესიები, რაც სუსს შეეძლო განეხორციელებინა, შემიძლია ვთქვა, რომ აქ იყო გარკვეული ბალანსი დაცული, იმ ვითარებაში და იმ სისტემის პირობებში, რა სისტემაც არსებობს საქართველოში, ხელისუფლების მართვის თვალსაზრისით.
- რა მოხდა, რატომ გაუშვეს?
- არ მინდა ახლა შეთქმულების თეორიებში შევიდე, მაგრამ მე ვფიქრობ, ლილუაშვილისთვის პერსონალურად ეს ძალიან მნიშვნელოვანი მომენტია. ის ჩამოშორდა ამ სისტემას, რომელიც ხვალ და ზეგ უფრო მეტად რეპრესიული გახდება.
- ანრი ოხანაშვილისგან რას უნდა ველოდოთ?
- ანრი ოხანაშვილისგან, მე ვფიქრობ, ყველაფერს უკიდურესს უნდა ველოდოთ. განა, რა შეიძლება ამ ქვეყანაში ამაზე უკიდურესი მოხდეს, მაგრამ ეს ცვლილება თვალნათლივ მიანიშნებს ერთს: სუსი „ქართული ოცნების“ პოლიტიკური ინსტრუმენტი ხდება. მიუხედავად იმისა, რომ ლილუაშვილი „ქართული ოცნებიდან“ წამოსული ადამიანია, „ოცნების“ პარტიული ნაწილი არასოდეს არ ყოფილა.
- ანრი ოხანაშვილი კი პირდაპირ კობახიძის კადრია და არა ბიძინა ივანიშვილის...
- დიახ ასეა. მე ვფიქრობ, რომ ლილუაშვილი ასე თუ ისე გარკვეულ ბალანსს იჭერდა, რაც კობახიძისთვის მიუღებელი იყო. დღეს ივანიშვილისთვის პირადი უსაფრთხოების მომენტები ბევრად უფრო მნიშვნელოვანია, დიახ ლილუაშვილის ხელში ის თავს უფრო ბევრად დაცულად გრძნობდა, ისევე, როგორც გომელაურის ხელში. თუმცა პოლიტიკური რეპრესიებისთვის ლილუაშვილი შესაფერისი კადრი არ იყო.
- ანუ სუსში უფრო „მკაცრი“ ხელი უნდოდათ?
- რა თქმა უნდა! ამას უნდა ველოდოთ კიდეც. ასევე ყველა წინა ანგარიშში, რომელიც გამოქვეყნდა ლილუაშვილის ხელმძღვანელობის პერიოდში, საქართველოსთვის ნომერ პირველ საფრთხედ დასახელებული იყო რუსეთი და იქიდან მომდინარე საფრთხეები. ვნახოთ, ოხანაშვილის პირობებში ეს ყველაფერი როგორ წარმოჩინდება. ასევე ძალიან მნიშვნელოვანია ამ რეპრესიებში რამდენად ჩაერთვება სუსი სხვა მექანიზმებითაც. სუსს აქვს ყველანაირი კონტროლის მექანიზმი. სუსი უკვე პარტიული პოლიციაა. ეს ძალიან საშიში და საფრთხილო საკითხია სახელმწიფოს უსაფრთხოებისთვისაც. მოკლედ, გესტაპოს სამსახური იწყებს მუშაობას. პარტიული პოლიციისა და პარტიული უსაფრთხოების სამსახურის იერს იღებს ყველაფერი. თუ დავაკვირდებით, „ქართული ოცნების“ პერიოდშიც კი, სახელმწიფო უსაფრთხოების სამსახურის პირველი პირის თანამდებობა, პარტიულ ნომენკლატურულ პერსონას აქამდე არ დაუკავებია. შესაბამისად, ეს გარკვეული საფრთხეების მიმანიშნებელია. დაველოდოთ, ჩემთვის ინდიკატორი იქნება, თუ რა მოხსენებით წარსდგება ანრი ოხანაშვილი, ვის დაასახელებს ნომერ პირველ საფრთხედ?!
- გოჩა, თეა წულუკიანის ხელით და მისი კომისიით ვხედავთ, როგორ ანგარიშსწორებას აქვს ადგილი ოპოზიციონერ ლიდერებზე. „პირველი მერცხალი“ მამუკა ხაზარაძე იყო, ვნახეთ, რომ პროკურატურას გადაეგზავნა მისი საქმე და გუშინ მას სასამართლომ აღმკვეთი ღონისძიების სახით 50 ათას ლარიანი გირაო შეუფარდა. რა ჩაიფიქრა „ოცნებამ“? სადამდე მივლენ? მთლიანად უნდათ, რომ აკრძალონ ოპოზიციური პარტიები და ასევე პიროვნებებიც?
- ეს არის ანგარიშსწორება, მაგრამ თავად კომისიის წევრებიც საშინელ ხაფანგში არიან. დავიჯერო, ამას ვერ ათვითცნობიერებენ?! კომისიის შემადგენლობის წევრების ნაწილი, სწორედ, რომ ნაციონალების ხელისუფლებაში იყო. მაინტერესებს, მათ არ დაუსვამენ კითხვებს? ან თავად სუბარს თუ მოუსმენს ვინმე, თუნდაც ადამიანის უფლებების დაცვის კუთხით. ან იმ პერიოდში სომხეთში საქართველოს ელჩს, შარმანაშვილს?! ან აჭარის პოლიციის ყოფილ უფროსს, ბატონ ტაბატაძეს, რომელიც ასევე კომისიაში ზის! რომელი ერთი გავიხსენო?! იქნებ თავიანთი თავებიც დაკითხონ!
- თუ დასჭირდათ, დაიჭერენ ოპოზიციონერ ლიდერებს? ახლა გირაო შეუფარდეს ხაზარაძეს, მაგრამ მისი დაკავება უნდათ და ცდილობენ, ამ გზით გაანეიტრალონ?
- რადგან პროკურატურამ თავიდანვე გირაო მოითხოვა, ველოდი, რომ სასამართლოც ამ გადაწყვეტილებას გამოიტანდა. თუმცა,, საბოლოო მიზანი არ არის გამორიცხული, რომ მისი დაპატიმრება იყოს. „ქართული ოცნება“ ცდილობს, ბოლომდე რქებით მიაწვეს თავის სურვილებს. გირაოს შეფარდებაც პასუხისგებაში მიცემაა, ეჭვმიტანილად ცნობაა. ცხადია, ასე გამოკვეთილი ლიდერების დევნა და მათ მიმართ რეპრესიები ხდება მათ შესაშინებლად. წესით, ახლა ხაზარაძე უნდა ნანობდეს მის საქციელს. აშშ-ში რომ ბიძინას კარის ბიზნესმენების ლობირება დაიწყო. აბა, ახლა ნახოს, რა მოხდება, მის გადასარჩენად ხმას არავინ არ ამოიღებს. თავადაც ხომ ამ წიაღიდან არის და ხომ იცის ამ ადამიანების ფილოსოფია?! ვინ დაუდგება ახლა მას მხარში? არც არავინ! განსაკუთებით კი სუსის სადამსჯელო სტრუქტურად ქცევის შემდეგ.
- რა იქნება ამ ყველაფრის ფინალი? სადამდე მივალთ?
- გამოუსწორებელი ოპტიმისტი ვარ! ისედაც ეს ხომ ზამბარის პრინციპია, რაც უფრო მეტად შეიკუმშება, მით უფრო მძლავრი და მტკივნეული იქნება ფინალი. წარმოგიდგენიათ, როგორი რეპრესიები აქვთ მთელი ამ 126 დღის განმავლობაში ჩატარებული. რა არ აკეთეს და ამითაც უკმაყოფილონი არიან საკუთარი თავით, რადგან ვერ შეძლეს, ქართველ ხალხში საბოლოოდ ჩაეხშოთ საპროტესტო მუხტი.
- გოჩა, ასეთი შეფასებაც მოვისმინე, რომ ლილუაშვილის ოხანაშვილის ჩანაცვლებით, მთლიანად ირაკლი კობახიძეს აჰკიდა ივანიშვილმა პასუხისმგებლობა. ასეა?
- რა თქმა უნდა, ასეა. აჰკიდა და როცა დასჭირდება, ხელსაც მას შეაწმენდს.
- თანაც რეგიონებში სუსის ყოფილი უფროსი კარგად იმუშავებს წინასაარჩევნოდ.
- ეგ კიდევ ცალკე თემაა. საარჩევნოდ ძირითად გადაწყვეტილებებს მაინც პარტია მიიღებს. თუმცა ,ლილუაშვილის იქ დარჩენა და შემდგომ იმ ნაბიჯების გადადგმა, რასაც აპირებენ, პირდაპირ ასოცირებული იქნებოდა ბიძინა ივანიშვილთან. პასუხისმგებლობები, რასაკვირველია არც მას მოეხსნება. თუმცა პოლიტიკური და სამართლებრივი პასუხისმგებლობები კობახიძესა და მის გუნდს გადააბარა. პერსონალურად კობახიძეს გადააბარა. ერთი იცოდეთ, ბიძინა ივანიშვილი შესაძლოა, ყველა თანამდებობას შეელიოს, მაგრამ შსს მინისტრის თანამდებობას არ შეელევა. იქ თავისი კადრი უნდა ჰყავდეს. ამ ეტაპზე ეს არის გომელაური. ივანიშვილის პირადი უსაფრთხოების სისტემა, არასოდეს არ იდგა სუსზე, ის იდგა შს სამინისტროზე. ამიტომ ამ სამინისტროს ის მუდმივად გააკონტროლებს. სულ პრობლემაა ქართულ პოლიტიკაში, როდესაც ივანიშვილის, როგორც პოლიტიკური მოთამაშის, დაუფასებლობა ხდება. არასწორმა შეფასებებმა გამოიწვია ეს ყველაფერი. ჩვენ ტელეეკრანებიდან ვისმენდით პოლიტიკური ლიდერების განცხადებებს, რომ ივანიშვილი ხიხოა. ხიხო ვინც არის, ახლა კი ვხედავთ. ივანიშვილი საკმაოდ ჭკვიანი მოთამაშეა. მან სუსთან დაკავშირებით ცალკეული პასუხისმგებლობები აირიდა.
- რატომ, ასეთს რას აპირებს სუსი?
- არა მარტო შიგნით გასატარებელ რეპრესიებთან დაკავშირებით, არამედ გარე სტრატეგიულ საკითხებსაც უკავშირდება ეს ყველაფერი.
- დაიწყებს სუსი თუნდაც ოპოზიციონერი ლიდერების შანტაჟს?
- სწორედ ამას მოასწავებს ლილუაშვილის ოხანაშვილით ჩანაცვლება. კი ბევრი კრებსითი მასალები გამოვიდა, ბევრმა ინფორმაციამ გამოჟონა სუსიდან, მაგრამ პერსონალური მონაცემები არ გამოსულა. ახლა კომპრომატების პერსონალური გამოყრა და შანტაჟი დაიწყება. დაიწყება აქტივისტებზე, ოპოზიციონერ ლიდერებზე, საზოგადოებისთვის ცნობილ ადამიანებზე, ვისი აზრიც მნიშვნელოვანია. ზოგს გამოუყრიან, ზოგთანაც მივლენ და დააშანტაჟებენ. შანტაჟს კი ყველა ერთნაირად ვერ უძლებს. ესეც გამოჩნდება, არ დაიმალება. რომც დააშანტაჟონ, თუ გაჩუმდა და გავიდა ბრძოლიდან, ანუ მასზე კომპრომატები აქვთ. ამას ყველა მივხვდებით. ასე რომ, ჩუმად ეს ამბავი არ გამოვა.
