პატიმრობაში მყოფი პარტია „დროას“ ლიდერის, ელენე ხოშტარიას განცხადებით, ოპოზიციის გამარჯვებისთვის აუცილებელია არა მხოლოდ ერთიანობა, არამედ ყოველდღიური, თანმიმდევრული და დისციპლინირებული მუშაობა.
სოციალურ ქსელში გავრცელებულ განცხადებაში ხოშტარია წერს, რომ ოპოზიციამ თავად უნდა შექმნას პოლიტიკური დღის წესრიგი და არა ხელისუფლებამ.
„სინამდვილეში არანაირი მნიშვნელობა არა აქვს, რას გვიპირებს ივანიშვილი. მნიშვნელოვანია, ჩვენ რას ვუპირებთ მას“, – წერს ხოშტარია.
მისი შეფასებით, ოპოზიცია ყოველდღიურად უნდა აჩვენებდეს საზოგადოებას ერთიანობას და აქტიურ ბრძოლას.
„გამარჯვებისთვის ჩვენ გვჭირდება არა მხოლოდ ერთიანობა, არამედ თანმიმდევრული და დისციპლინირებული მუშაობა. ყოველ დილით თქვენ უნდა ხედავდეთ არა პაპუაშვილს, არამედ ოპოზიციის ლიდერებს; უნდა ხედავდეთ არა ცალ-ცალკე პარტიებს, არამედ ერთად მოსიარულე ოპოზიციას. ეს არის ის, რაც ჩვენ შეგვიძლია და გვევალება“, – აცხადებს ხოშტარია.
მისივე თქმით, ოპოზიციის ამოცანა უნდა იყოს თავისუფალი და სამართლიანი არჩევნებისთვის ბრძოლა, უსამართლოდ დაჩაგრული ადამიანების დაცვა და ხელისუფლების ქმედებების ყოველდღიური კრიტიკა.
„ჩვენ უნდა ვიბრძოდეთ ყოველდღიურად, რადგან ჩვენ ვერჩით მას და აუცილებლად დავამარცხებთ, მიუხედავად იმისა, რამდენწლიან სასჯელს მოიგონებს ოპონენტებისთვის“, – წერს ელენე ხოშტარია.
