2026 წლის იანვარ-ივნისში ჯარიმებიდან, სანქციებიდან და საურავებიდან სახელმწიფო ბიუჯეტში მიღებული შემოსავალი წლიურად 70.4%-ით, ანუ თითქმის 123 მილიონი ლარით გაიზარდა. ამასთან, საგზაო მოძრაობის წესების დარღვევისთვის გამოწერილი ჯარიმებიდან მიღებული შემოსავალი 54%-ით, ანუ თითქმის 52 მილიონი ლარით არის გაზრდილი. ინფორმაციას BPN ავრცელებს.
გამოცემის ცნობით, საქართველოს ნაერთი ბიუჯეტის მონაცემების მიხედვით, 2026 წლის პირველ ექვს თვეში სანქციებიდან, საურავებიდანა და ჯარიმებიდან მიღებულმა შემოსავალმა 297.6 მილიონი ლარი შეადგინა, მაშინ როცა 2025 წლის ანალოგიურ პერიოდში ეს მაჩვენებელი 174.6 მილიონი ლარი იყო.
მონაცემების მიხედვით, წელს ბიუჯეტში შესული 297 მილიონი ლარიდან 242.1 მილიონ ლარზე მეტი ადმინისტრაციულ სამართალდარღვევებზე გამოწერილ ჯარიმებზე მოდის. შედარებისთვის, 2025 წლის პირველ ნახევარში ამავე მუხლით ბიუჯეტში 140.3 მილიონი ლარი შევიდა.
გაზრდილია საგზაო მოძრაობის წესების დარღვევისთვის დაკისრებული ჯარიმებიდან მიღებული შემოსავალიც. ფინანსთა სამინისტროს მონაცემებით, 2026 წლის იანვარ-ივნისში ამ მიმართულებით ხაზინაში 148.4 მილიონი ლარი შევიდა, ხოლო 2025 წლის იმავე პერიოდში – 96.4 მილიონი ლარი.
