„ნეტგაზეთის“ ჟურნალისტი დათო ქოქოშვილი სოციალურ ქსელში ლაზარე ჯორბენაძის შესახებ წერს, რომლის გარდაცვალების გარემოებებთან დაკავშირებით კითხვები ყოფილმა პრემიერ-მინისტრმა ირაკლი ღარიბაშვილმა ციხიდან გამოგზავნილ წერილში დასვა.
ქოქოშვილის ინფორმაციით, ლაზარე ჯორბენაძე — რომლის საერო სახელიც ზურაბი იყო — გაზეთ „ასავალ-დასავალის“ ხშირი რესპონდენტი გახლდათ და სხვადასხვა დროს მედიაში სასულიერო პირის, ყოფილი პოლიტიკოსისა და უშიშროების ვეტერანის სტატუსით ჩნდებოდა.
ჟურნალისტის თქმით, მიმდინარე წლის დასაწყისში „ასავალ-დასავალში“ გამოქვეყნებულ ინტერვიუში ჯორბენაძე ამტკიცებდა, რომ ირაკლი კობახიძემ აზერბაიჯანის პრეზიდენტ ილჰამ ალიევთან ხელი მოაწერა საიდუმლო დოკუმენტს, რომლითაც დავითგარეჯის ტერიტორიის ნაწილი დათმო. ქოქოშვილი ხაზგასმით აღნიშნავს, რომ ჯორბენაძეს ამ ბრალდების დამადასტურებელი მტკიცებულება არ წარმოუდგენია და მხოლოდ აცხადებდა, რომ შესაბამისი დოკუმენტი თავად ჰქონდა ნანახი.
ქოქოშვილის თანახმად, ინტერვიუს გამოქვეყნებას ჯორბენაძის წინააღმდეგ ხელისუფლების მხარდამჭერი სოციალური მედიის ანგარიშების კამპანია მოჰყვა. მოგვიანებით ჯორბენაძემ „ასავალ-დასავალს“ კიდევ ერთი ინტერვიუ მისცა, რომელშიც განაცხადა, რომ საკუთარ სიტყვებს უკან არ წაიღებდა და კობახიძის შესახებ გამოთქმულ ბრალდებას კვლავ იმეორებდა.
„ამ ამბებიდან ცოტა ხნის შემდეგ ლაზარე ჯორბენაძე გარდაცვლილი იპოვეს. ოფიციალური ვერსია, რომელსაც, როგორც ჩანს, ოჯახიც იზიარებს, თვითმკვლელობაა“, — წერს ქოქოშვილი.
მისივე ინფორმაციით, ჯორბენაძის მეგობარი და „ასავალ-დასავალის“ ჟურნალისტი დიტო ჩუბინიძე თვითმკვლელობის ვერსიას არ ეთანხმება და მიიჩნევს, რომ ჯორბენაძე მოკლეს. ქოქოშვილის თქმით, ჩუბინიძე და გამოცემა საქმის გამოძიებასა და მის მკვლელობად კვალიფიცირებას ითხოვენ.
ჟურნალისტი ასევე მსჯელობს, რატომ შეიძლებოდა კობახიძე-მდინარაძის გუნდს ჯორბენაძის ინტერვიუების უკან ირაკლი ღარიბაშვილის კვალი დაენახა. მისი შეფასებით, ჯორბენაძის მიერ დავითგარეჯის საკითხზე გავრცელებული ვერსია პოლიტიკურად ხელსაყრელი იყო ღარიბაშვილისთვის, რომელიც თავის დროზე კამპანიის „გარეჯი საქართველოა“ ერთ-ერთი მთავარი პოლიტიკური სახე იყო.
„ამ ინტერვიუებმა და ახალმა კონსპირაციებმა კი ამ შეკითხვებს ადრესატი შეუცვალა“, — წერს ქოქოშვილი.
მისივე ინფორმაციით, დიტო ჩუბინიძე აცხადებს, რომ ირაკლი ღარიბაშვილს პირადად არ იცნობს და არასდროს შეხვედრია, თუმცა იცნობს მის სიმამრს, თამაზ თამაზაშვილს და მას დადებითად ახასიათებს. ამასთან, ჩუბინიძე ღარიბაშვილის მხარდაჭერას არ მალავს და მიიჩნევს, რომ ოპოზიციაში გადასვლის შემთხვევაში ყოფილ პრემიერს „ქართული ოცნებისა“ და ბიძინა ივანიშვილის დამარცხება შეუძლია.
