ფრანგი ხალხისადმი მიმართვაში მაკრონმა ქვეყნის სხვადასხვა ქალაქში განვითარებულ მოვლენებზე ისაუბრა და მომხდარს „წარმოუდგენელი ძალადობა“ უწოდა.
„თავდასხმა განხორციელდა საჯარო დაწესებულებებზე, მაღაზიებსა და მუნიციპალურ შენობებზე, ზოგიერთი კი განადგურდა კიდეც“, – განაცხადა საფრანგეთის პრეზიდენტმა.
მაკრონის თქმით, არეულობების შედეგად ასობით პოლიციელი დაშავდა, ხოლო ქალაქებში მომხდარმა ნგრევამ საზოგადოებაში აღშფოთება გამოიწვია.
„როდესაც კადრებს ვუყურებდით, ყველას გვიჩნდებოდა კითხვა: რა ხდებოდა მათ გონებაში? როგორ შეუძლიათ ფრანგებს ასე მოექცნენ საფრანგეთს?“ – აღნიშნა მან.
პრეზიდენტის განცხადებით, საზოგადოებრივი უკმაყოფილების გამოხატვა ძალადობასა და სახელმწიფო თუ კერძო საკუთრების განადგურებას ვერ გაამართლებს.
„ამაღამ ყველანი განვიცდით ბრაზსა და სირცხვილს. აუტანელია იმის ყურება, თუ როგორ არის დარბეული ჩვენი ქალაქები და მათი ქუჩები“, – განაცხადა მაკრონმა.
საფრანგეთის პრეზიდენტმა ყურადღება გაამახვილა ქვეყანაში დაგეგმილ საპრეზიდენტო არჩევნებზეც და აღნიშნა, რომ პოლიტიკური დაპირისპირება დემოკრატიული დისკუსიის ფარგლებში უნდა დარჩეს.
მისი თქმით, პოლიტიკური პარტიებისა და მათი მხარდამჭერების პოზიციები საჯარო შეხვედრებზე, მედიასა და მშვიდობიან დებატებში უნდა გამოიხატებოდეს.
„ეს დებატები უნდა შედგეს საინფორმაციო სივრცეში, გაზეთებსა და ტელევიზიებში, მშვიდობიან შეხვედრებზე, სადაც ადამიანები ერთმანეთს პატივისცემით ესაუბრებიან და არავითარ შემთხვევაში არეულობასა და ქაოსში“, – განაცხადა მაკრონმა.
საფრანგეთის პრეზიდენტის შეფასებით, ქვეყანას სჭირდება ღირსეული საარჩევნო პროცესი, რომელიც მოქალაქეების პასუხისმგებლიან მონაწილეობასა და განსხვავებული აზრის პატივისცემას დაეფუძნება.
„ეს მართლაც მნიშვნელოვანია და პასუხისმგებლიან მიდგომას მოითხოვს“, – აღნიშნა მან.
მიმართვის დასასრულს მაკრონმა მოქალაქეებს კიდევ ერთხელ მოუწოდა სიმშვიდის შენარჩუნებისა და ერთმანეთის პატივისცემისკენ.
„ჩვენ უნდა გავერთიანდეთ“, – განაცხადა საფრანგეთის პრეზიდენტმა.
