შალვა პაპუაშვილი - სპეციალური საგამოძიებო სამსახურის დამოუკიდებლად არსებობა ჩვენი მოქალაქეების უფლებრივი მდგომარეობის გაუმჯობესებას ემსახურება

მინდა, წარმატება ვუსურვო სპეციალურ საგამოძიებო სამსახურს, დავუდასტურო პარლამენტის გვერდში დგომა მის ინსტიტუციურ გაძლიერებაში. ვფიქრობ, მნიშვნელოვანია, ამ სამსახურმა აჩვენოს წარმატება, – ამის შესახებ საქართველოს პარლამენტის თავმჯდომარე შალვა პაპუაშვილმა სპეციალური საგამოძიებო სამსახურის მიერ გაწეული საქმიანობისა და სამომავლო გეგმების პრეზენტაციაზე სიტყვით გამოსვლისას განაცხადა.

„მნიშვნელოვანია, რომ წარმატებული იყოს ეს სამსახური და გადაილახოს ის სკეპტიციზმი, რომელიც არსებობდა დასაწყისში და შეიძლება, ჯერ კიდევ არის შემორჩენილი; დარწმუნდეს მთლიანად ჩვენი საზოგადოება, რომ ასეთი ინსტიტუციის ცალკე, დამოუკიდებლად არსებობა მხოლოდ საქმეს წაადგება და საბოლოო ჯამში, ისევ ჩვენი მოქალაქეების უფლებრივი მდგომარეობის გაუმჯობესებას ემსახურება“, – აღნიშნა შალვა პაპუაშვილმა.

პარლამენტის თავმჯდომარემ სპეციალური საგამოძიებო სამსახურის მნიშვნელობაზე გაამახვილა ყურადღება. მისი თქმით, სამსახურის როლი ადამიანის უფლებრივი მდგომარეობის გაუმჯობესების მიმართულებით ძალიან დიდია. შალვა პაპუაშვილმა სამსახურის ინსტიტუციური გაძლიერების მნიშვნელობაზე გაამახვილა ყურადღება. მისი თქმით, ამ მიმართულებით პარლამენტში მიდის მუშაობა და არის იდეები, თუ როგორ შეიძლება, მოხდეს როგორც სპეციალური საგამოძიებო, ისე პერსონალურ მონაცემთა დაცვის სამსახურის ინსტიტუციური გაძლიერება.

„დამოუკიდებელი საგამოძიებო სამსახურის არსებობა გახლავთ ასევე ასოცირების შეთანხმების ნაწილიც და სწორედ ამითაც იყო განპირობებული ზოგადად ამ მიმართულების დამოუკიდებლად გამოყოფა. 12 რეკომენდაციიდან ასევე ერთ-ერთია, რომ გაძლიერდეს სპეციალური საგამოძიებო სამსახურის საქმიანობა. ამ მიმართულებით პარლამენტში მიდის მუშაობა და არის იდეები, თუ როგორ შეიძლება, მოხდეს ამ სამსახურის ინსტიტუციური გაძლიერება, ისე, როგორც პერსონალურ მონაცემთა დაცვის სამსახურის. როდესაც განხორციელდა სახელმწიფო ინსპექტორის სამსახურის რეფორმა და მოხდა გაყოფა სპეციალური საგამოძიებო და მონაცემთა დაცვის სამსახურებად, ამან გვაჩვენა, რომ ეს რეფორმა იყო წარმატებული. გვახსოვს, რომ ამ საკითხთან დაკავშირებით იყო დისკუსია სხვადასხვა მხრიდან, მაგრამ როდესაც ვნახეთ პერსონალურ მონაცემთა დაცვის სამსახურის ანგარიში, ამ ანგარიშმა ჩვენ გვაჩვენა, თუ რამდენად მნიშვნელოვანია, როდესაც კონცენტრირებულად მუშაობს სამსახური ამ მიმართულებით. ჩვენ ვხედავთ, რომ კონცენტრირებულად არის მომართული სამსახური გარკვეული მიმართულებით. ამანაც საბოლოო ჯამში გვაჩვენა, რომ ეს რეფორმა, ერთი მხრივ, იყო საჭირო და მეორე მხრივ, არის წარმატებული“, – განაცხადა შალვა პაპუაშვილმა.