მაკა გიორგობიანი - ეს გამარჯვება ქართული ფიგურული ციგურაობის ისტორიისთვის უმნიშვნელოვანესია

გუბანოვამ მოკლე და თავისუფალ პროგრამაში შესანიშნავად იასპარეზა, ჯამში 199.10 ქულა დააგროვა და ევროპის ჩემპიონი გახდა.

საქართველოს პირველი არხი ფიგურული ციგურაობის ფედერაციის პრეზიდენტს, მაკა გიორგობიანს დაუკავშირდა, რომელიც ფინეთის ქალაქ ესპოოში ევროპის ჩემპიონატზე იმყოფება.

„ეს წარმატება არის უმნიშვნელოვანესი ზოგადად ქართული ფიგურული ციგურაობის ისტორიისთვის და ასევე უმნიშვნელოავანესია ჩვენი ფედერაციის მომავლისათვის.

ბრძოლა ურთულესი, დაძაბული და კონკურენტული იყო. ამ ფაქტორების მიუხედავად, ანასტასიამ ყველაფერი გააკეთა. ეს არ იყო მხოლოდ ფიზიკური ბრძოლა, აქ იყო ურთულესი ფსიქოლოგიური ჭიდილიც, მაგრამ ამ ყველაფრის ფონზე ჩვენი ქვეყნის სახელი გავიტანეთ ყველაზე მაღალ საფეხურზე.

„მადლობა“, – ევროპის ჩემპიონატზე მიღწეული ტრიუმფის შემდეგ ეს იყო ის პირველი სიტყვა, რაც მე ანასტასია გუბანოვას ვუთხარი. ეს გამარჯვება, პირველ რიგში, ანასტასიას თავდაუზოგავი შრომის შედეგია.“

დღეს მოგვიანებით ასევე ყინულზე გავლენ მოცეკვავე წყვილები – გიორგი რევია და მარია კაზაკოვა, რომლებიც პირველი გამოსვლის შემდეგ მე-8 ადგილზე არიან. ევროპის ჩემპიონატზე ინდივიდუალურ ასპარეზობაში ასევე მიიღეს მონაწილეობა ნიკა ეგაძემ და მორის ყვითელაშვილმა, რომლებიც, შესაბამისად, მე-7 და მე-16 ადგილზე გავიდნენ.

#1TVSPORT