გარემოს ეროვნული სააგენტოს ინფორმაციით, 28 სექტემბრის დღის ბოლოდან 1-ელი ოქტომბრის დილამდე საქართველოში ამინდის გაუარესებაა მოსალოდნელი.
სააგენტოს ცნობით, აღნიშნულ პერიოდში ქვეყანაში დროგამოშვებით ნალექი იქნება. დასავლეთ საქართველოს უმეტეს რაიონში, ასევე აღმოსავლეთ საქართველოს მთიან და მაღალმთიან რაიონებში ნალექი ზოგან ძლიერი ინტენსივობის იქნება.
მოსალოდნელია ელჭექი, სეტყვა, ქარის გაძლიერება და ზღვაზე 3-4-ბალიანი შტორმული ღელვა.
„მოსალოდნელმა ძლიერმა ნალექებმა შესაძლებელია მდინარეებზე წყლის დონის მნიშვნელოვანი მატება, პატარა მდინარეებზე წყალმოვარდნები, ხოლო გორაკ-ბორცვიან და მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს“, - ნათქვამია სააგენტოს ინფორმაციაში.
გარემოს ეროვნული სააგენტოს შეფასებით, საფრთხის დონე საშუალოა.
