კომპანია „ვაგნერის“ დამფუძნებელი ევგენი პრიგოჟინი უკრაინაში ე.წ. სპეციალური სამხედრო ოპერაციის დასრულებულად გამოცხადების ინიციატივით გამოდის, – ამის შესახებ პრიგოჟინი სოციალურ ქსელში გამოქვეყნებულ წერილში წერს.
„ხელისუფლებისა და საზოგადოებისთვის დღეს აუცილებელია სპეციალურ სამხედრო ოპერაციაში რამე მსხვილი წერტილის დასმა. იდეალური ვარიანტია სპეციალური სამხედრო ოპერაციის დასრულების გამოცხადება, ყველასთვის იმის შეტყობინება, რომ რუსეთმა მიაღწია შედეგებს, რომლებსაც გეგმავდა და, გარკვეული თვალსაზრისით, ჩვენ ნამდვილად მივაღწიეთ მათ. ჩვენ გავანადგურეთ უკრაინის შეიარაღებული ძალების მებრძოლების უდიდესი რაოდენობა და შეგვიძლია, საკუთარი თავის წინაშე წარვადგინოთ ანგარიში, რომ სპეციალური სამხედრო ოპერაციის ამოცანები შესრულებულია“, – წერს პროგოჟინი.
მიღწეულ ამოცანებს შორის პრიგოჟინი ასახელებს უკრაინის აქტიური მამაკაცების დიდი ნაწილის განადგურებას, მოსახლეობის სხვა ნაწილის დაშინებას, აზოვისა და შავი ზღვის ნაწილის მოწყვეტას, უკრაინის ტერიტორიის დიდი ნაწილის დაპყრობას და ყირიმთან დამაკავშირებელი სახმელეთო დერეფნის შექმნას. პრიგოჟნის აზრით, ახლა საჭიროა უკვე დაკავებულ ტერიტორიებზე გამაგრება. ამასთან, ის აღნიშნავს, რომ აქამდე თუკი უკრაინა „ყოფილი რუსეთის ნაწილი იყო, ახლა ის არის აბსოლუტურად ნაციონალურად ორიენტებული სახელმწიფო“.
ვრცელ წერილში პრიგოჟინი ვარაუდობს, რომ უკრაინის შეიარაღებული ძალების წარმატებული კონტრშეტევის შემთხვევაში, რუსეთის არმიაში, შესაძლოა, განწყობების ვარდნა დაიწყოს, რასაც სიტუაციის დეგრადირება მოჰყვეს. პრიგოჟინის აზრით, ამან შეიძლება, რუსულ საზოგადოებაში გლობალური ცვლილებები გამიწვიოს.
