პარტია „დროას“ ლიდერის, პატიმრობაში მყოფი ელენე ხოშტარიას შეფასებით, შალვა პაპუაშვილის ევროპაში ვიზიტი ევროკავშირთან ურთიერთობის გაუმჯობესებას არ ემსახურება და მისი მიზანი შესაძლო ესკალაციისთვის ნიადაგის მომზადებაა. ამის შესახებ ხოშტარიას სოციალურ ქსელში გავრცელებულ განცხადებაშია ნათქვამი.
„ნათელია, რომ მათ ორი ამოცანა აქვთ: ევროკავშირთან ურთიერთობის შეწყვეტა დაჰბრალდეს ევროკავშირს და ხალხისგან, მათ შორის, საკუთარი ამომრჩევლისგან არ მიიღონ პროტესტი“, - წერს ხოშტარია.
მისი ვარაუდით, „ქართული ოცნება“ ელოდება, რომ ევროკავშირი შემოდგომაზე საქართველოსთან დაკავშირებით მნიშვნელოვან გადაწყვეტილებებს მიიღებს, რასაც საზოგადოებაში უკმაყოფილება მოჰყვება. ხოშტარია მიიჩნევს, რომ პაპუაშვილის ვიზიტი ხელისუფლებას საშუალებას მისცემს, შემდგომში განაცხადოს, რომ ევროკავშირთან ურთიერთობის შესანარჩუნებლად ყველაფერი გააკეთა.
ხოშტარია საზოგადოებას შესაძლო პოლიტიკური ესკალაციისთვის მზადყოფნისკენ მოუწოდებს. მისი თქმით, საპროტესტო, ოპოზიციურ, აქტივისტურ და საზოგადოებრივ ჯგუფებს შორის წინასწარი კომუნიკაციაა საჭირო, რათა მოვლენების განვითარების სხვადასხვა სცენარი განიხილონ.
„ვიყოთ მზად, როგორც ევროკავშირის გადაწყვეტილებებისთვის, ასევე „ოცნების“ პროპაგანდისტული, ტყუილზე დაფუძნებული მოქმედებებისთვის და შესაძლოა, რეპრესიების გამკაცრებისთვისაც“, - წერს ხოშტარია.
მისივე განცხადებით, შემოდგომაზე ფართომასშტაბიან ანტირუსულ აქციას ელოდება.
„ამ შემოდგომას დიდი ანტი-რუსული აქცია არის გარდაუვალი და ეს არის ძალიან მნიშვნელოვანი რუსეთისთვის საჩვენებლად“, - აღნიშნავს ხოშტარია.
