იაგო ხვიჩია - კითხვა, რომელსაც ნებისმიერ „ქოცთან“ უნდა ვსვამდეთ: რას ვიღებთ სანაცვლოდ, როდესაც ამდენ რამეს ვკარგავთ ამ უაზრო კანონით?

იბადება კითხვა, რომელსაც ყოველ წუთს ნებისმიერ „ქოცთან“ უნდა ვსვამდეთ: რას ვიღებთ სანაცვლოდ, როდესაც ამდენ რამეს ვკარგავთ ამ უაზრო კანონით? ან რა ღირებულება დევს ამ ე.წ. NGO-ების გამჭვირვალობაში ისეთი, რომლის საფასურადაც ქვეყნის თანამდებობის პირები უნდა დასანქცირდნენ, ხალხმა უნდა დაკარგოს ვიზალიბერალიზაცია და არ უნდა დავიწყოთ მოლაპარაკებები ევროკავშირში გაწევრიანებასთან დაკავშირებით?, - ამის შესახებ პარტია "გირჩის" დეპუტატმა, იაგო ხვიჩიამ ევროპარლამენტის რეზოლუციაზე საუბრისას განაცხადა.

როგორც ხვიჩია აღნიშნავს, არ იცის ევროპარლამენტის რეზოლუციის პუნქტები აღსრულდება თუ არა, მაგრამ "იქ რომ ის საკითხებია მოხვედრილი, რომელიც ჩვენს მოსახლეობას არაფერში აწყობს და არც არაფერში სჭირდება, ცხადია".

"ჩემი აზრით, შეუძლებელია ახლა ზუსტად ვთქვათ, ჩვენ ვიზალიბერალიზაციას ჩამოგვართმევენ თუ არა, მაგრამ რაც ნამდვილად შეგიძლია ვთქვათ, არის ის კითხვები, თუ რატომ აკეთებს საქართველოს ხელისუფლება ამას? რატომ აყენებს კითხვის ნიშნის და დარტყმის ქვეშ ქართველი ხალხისთვის ძალიან მნიშვნელოვანს - ევროპასთან ურთიერთობას და ვიზალიბერალიზაციას? ჩემი აზრით, ეს არის მთავრობის მკაფიო მესიჯი ზოგადად, ქართველ ხალხთან დამოკიდებულების. ის ჯერ ამაყობდა, რომ ვიზალიბერალიზაცია მოუტანა ქვეყანას და ახლა რისკავს იმით, რომ საკუთარი უგუნური გადაწყვეტილების გამო, შეიძლება, ქართველმა ხალხმა დაკარგოს ევროპასთან უვიზო მიმოსვლა. ამის გარისკვის საჭიროება რატომ დგას? რა პრინციპს ვიცავთ ამით? თუ რატომ არის ეს ევროპისკენ სვლა, თუ ასეთი ნაბიჯების შედეგად შეიძლება ვიზალიბერალიზაცია დავკარგოთ, წარმოდგენა არ მაქვს. რა დგას მეორე მხარეს ისეთი, რომ ამას ასე ძალიან ვიცავთ, მე უბრალოდ არ მესმის," - განაცხადა ხვიჩიამ.

ცნობისთვის, ევროპარლამენტი „საქართველოში უცხოური აგენტების კანონის ხელახლა შემოტანის მცდელობებსა და სამოქალაქო საზოგადოებაზე მისი შეზღუდვების შესახებ“ მიღებულ რეზოლუციაში, რომელიც შესწორებებით დაამტკიცა, მოუწოდებს, განიხილონ ბიძინა ივანიშვილისთვის პირადი სანქციების დაწესება. ამასთან, ევროპარლამენტი იმეორებს მოწოდებას საქართველოს ხელისუფლების მიმართ, გაათავისუფლოს ყოფილი პრეზიდენტი მიხეილ სააკაშვილი ჰუმანიტარული ნიშნით და დაუშვას მისი საზღვარგარეთ სათანადო მკურნალობა. გარდა ამისა, ევროპარლამენტი მოუწოდებს, დროულად შეაფასოს საქართველოს მიერ დაგეგმილი „უცხოელი აგენტის“ კანონის გავლენა საქართველოს მიერ ვიზალიბერალიზაციის კრიტერიუმების უწყვეტ შესრულებაზე. ევროპარლამენტის მიერ დამტკიცებულ შესწორებაში ასევე საუბარია ლგბტქ+ შესახებ კანონპროექტის შესახებ. კიდევ ერთი შესწორებით, ევროპარლამენტი თვლის, რომ კანონმდებლობის მიღების შემთხვევაში, ევროკავშირმა სანქციები უნდა დაუწესოს საქართველოს პარლამენტის ყველა წევრს, ვინც ხმა მისცა „უცხოური გავლენის გამჭვირვალობის შესახებ” კანონპროექტის სასარგებლოდ.