არ მგონია, რომ ომის დაწყების თარიღთან დაკავშირებით სპეკულაციები იყოს სერიოზული, – ამის შესახებ საქართველოს პრემიერ-მინისტრმა, ირაკლი კობახიძემ განაცხადა.
მისი თქმით, რადიკალური ოპოზიციის მიდგომაა, რომ საზოგადოებას არაფერი აერთიანებდეს.
„თქვენ გახსოვთ, რომ ჩვენი პოლიტიკური ოპონენტები ამ თარიღს აღნიშნავდნენ წლების განმავლობაში 8 აგვისტოს და შემდეგ გადაწყვიტეს, რომ თურმე 7 აგვისტოს დაწყებულა ომი. ეს არის სპეკულაციები, რომელსაც საფუძველი არ აქვს. ერთადერთი მიზანია, რომ რაღაცნაირად გახლიჩონ საზოგადოება. არაფერი არ უნდა აერთიანებდეს ქართულ საზოგადოებას, ეს არის რადიკალური ოპოზიციის მიდგომა, მათ შორის ომის დაწყების თარიღი, რაც ჩვენთვის მიუღებელია. წლების განმავლობაში აღინიშნებოდა 8 აგვისტოს ომის დაწყების თარიღი და ეს გრძელდება ახლაც ასე“, – განაცხადა კობახიძემ.
