გოჩა მირცხულავა: კობახიძე მემკვიდრედ ბიძინას უნდა თუ არა, ამას არა აქვს მნიშვნელობა, კობახიძეს მიაჩნ
სანტე: 2018-ში ჩვენ აღმოვაჩინეთ შეუსაბამობა "ყვარლის ბაგის" რძეში, უარი ვთქვით გამოყენებაზე
02.04.2025 ნახვები: 323
რადიო თავისუფლების ჟურნალისტურ გამოძიებასთან დაკავშირებით კომპანია სანტე განცხადებას ავრცელებს და აცხადებს, რომ "ხარისხის სტანდარტებთან შეუსაბამობის შემთხვევაში რძე უბრუნდება ფერმას და არ გამოიყენება წარმოების პროცესში".
სანტეს განცხადებით, 2018 წელს სწორედ მათმა კომპანიამ აღმოაჩინა შეუსაბამობა "ყვარლის ბაგის" რძეში, რის გამოც უარი განაცხადა რძის მიღებასა და წარმოებაში მის გამოყენებაზე.
"სანტე 1997 წლიდან დღემდე უმსხვილესი რძის გადამამუშავებელი კომპანიაა საქართველოში, რომელიც წლის განმავლობაში 20 მილიონ ლიტრამდე რძეს იბარებს და ამუშავებს. თანამშრომლობს საქართველოს ბაზარზე არსებულ ყველაზე მსხვილ ფერმებთან, და გარდა ამისა, ფლობს რძის ჩაბარების პუნქტებს მთელი ქვეყნის მასშტაბით.
სანტეს დანერგილი აქვს რძის ხარისხის კონტროლის უმკაცრესი სტანდარტები. მათ შორის არის: რძეში ანტიბიოტიკის შემოწმება, ცხიმისა და ცილის იდენტიფიცირება, რძის მიკრობიოლოგიური ანალიზი.
ხარისხის სტანდარტებთან შეუსაბამობის შემთხვევაში რძე უბრუნდება ფერმას და არ გამოიყენება წარმოების პროცესში. 2018 წელს სწორედ სანტემ აღმოაჩინა შეუსაბამობა ყვარლის ბაგის რძეში, კერძოდ, ანტიბიოტიკები, რაც საქმეში წარმოდგენილი მასალებითაც დასტურდება და ამ მიზეზით უარი განაცხადა რძის მიღებასა და წარმოებაში მის გამოყენებაზე.
საწარმოში დანერგილი ხარისხის კონტროლის ევროპული და უმკაცრესი შიდა სტანდარტები, ასევე ISO, HACCP, არის გარანტია იმისა, რომ რძე, რომელიც შეუსაბამოა ხარისხის სტანდარტებთან, არ გამოიყენება წარმოებაში.
სანტე არის კომპანია, რომელიც ყოველთვის აწარმოებს უმაღლესი ხარისხის უსაფრთხო რძის პროდუქტებს მთელი საქართველოსთვის", - ვკითხულობთ განცხადებაში.
რადიო თავისუფლება ჟურნალისტურ გამოძიებას აქვეყნებს, რომელიც თანახმადაც, ბიზნესმენ ლაშა პაპაშვილის ნედლი რძის მწარმოებელი უდიდესი ფერმა ყვარლის ბაგა ძროხებს ევროკავშირში აკრძალული ქათმის ნაკელით კვებავდა. ის რძით ამარაგებდა სანტეს, სოფლის ნობათს, აგროჰაბს და რძის ლაბორატორიას.
გამოძიებაში საუბარია, თუ როგორ მოუგო ლაშა პაპაშვილის ყვარლის ბაგამ რევაზ ვაშაკიძის “ჩირინას” 4,7 მლნ ლარი. ლაშა პაპაშვილი ქართული ოცნების მხარდამჭერია. რევაზ ვაშაკიძე კი ქართული ოცნების მთავრობას აკრიტიკებს.
ჟურნალისტური გამოძიების მიხედვით, ლაშა პაპაშვილის ყვარლის ბაგამ სასამართლო დავა მოუგო ჩირინას (ბიუ-ბიუ), რომელსაც 4.7 მილიონის გადახდა დაეკისრა. გამოძიების თანახმად, 2018 წელს ყვარლის ბაგამ ჩირინასგან დაახლოებით 2 700 ტონა ქათმის ნედლი, გადაუმუშავებელი ნაკელი შეიძინა.
1 წლის თავზე, ყვარლის ბაგამ განაცხადა, რომ ჩირინაში ნაყიდმა სკინტლმა, რომელსაც ძროხებს აჭმევდა, საქონელი დაუხოცა და 1.65 მილიონი ლარის ზარალი მიიღო. ჩირინამ პრეტენზიები არ მიიღო და თქვა, რომ ქათმის ნაკელს სასუქად ყიდდა და არა - საკვებად.
2020 წელს ლაშა პაპაშვილის კომპანიამ ჩირინას სასამართლოში უჩივლა. მასალების მიხედვით, ყვარლის ბაგის 1 ძროხა დღეში დაახლოებით 6-7 კილო ქათმის ნაკელს ჭამდა (ნამჯაში არეულს).
როგორც საგამოძიებო მასალაში ვკითხულობთ, სანტემ მედიის კითხვებზე პასუხის გაცემა არ ისურვა. სოფლის ნობათში რადიო თავისუფლებას განუმარტეს, რომ ამ პერიოდის არქივი არ აქვთ, თუმცა, ჩვეულებრივ, მიღებულ პროდუქციას ამოწმებენ და საკუთარ სტანდარტებთან შეუსაბამობის შემთხვევაში, წარმოებაში აი იღებენ. აგროჰაბმა რადიო თავისუფლებას უთხრა, რომ იმ პერიოდში რძეს ყიდულობდნენ ყვარლის ბაგისგან, თუმცა არ იცოდნენ, რომ ძროხებს ნაკელს აჭმევდნენ.
რადიო თავისუფლების ჟურნალისტური გამოძიება სრულად.
