გაერთიანებული სამეფოს თავდაცვის მინისტრის, ჯონ ჰილის განცხადებით, უკრაინის თავდაცვის საკონტაქტო ჯგუფის მთავარი ამოცანა უკრაინელი მებრძოლებისთვის სასწრაფო სამხედრო დახმარების მიწოდებაა.
მისი თქმით, თებერვალში გამართულ შეხვედრაზე მონაწილე 50-ვე ქვეყანამ განაცხადა, რომ კიდევ უფრო გაზრდიდნენ უკრაინის დახმარებას და ქვეყანას 1,5 მილიარდი ფუნტის დახმარება აღუთქვეს.
„დღეს ჩვენ კიდევ მილიარდებს დავპირდებით“, - აღნიშნა გაერთიანებული სამეფოს თავდაცვის მინისტრმა ბრიუსელში, უკრაინის თავდაცვის საკონტაქტო ჯგუფის შეხვედრაზე.
მან სიტყვით გამოსვლისას უკრაინელებს მიმართა და როგორც ბრძოლაში, ასევე მშვიდობიან დროს მხარდაჭერა აღუთქვა.
„ჩვენ თქვენს გვერდით ვდგავართ ბრძოლაში და მშვიდობაშიც თქვენს გვერდით ვიქნებით“, - აღნიშნა გაერთიანებული სამეფოს თავდაცვის მინისტრმა.
ცნობისთვის, 50-მდე ქვეყნის წარმომადგენელი ბრიუსელში უკრაინის თავდაცვის საკონტაქტო ჯგუფის შეხვედრას მართავს, რომელსაც გერმანიისა და გაერთიანებული სამეფოს თავდაცვის მინისტრები თანათავმჯდომარეობენ. შეხვედრაზე მოისმენენ, რა ვითარებაა ადგილზე, რა არის საჭირო და როგორ შეუძლიათ მათ დახმარების გაწევა. აშშ-ის თავდაცვის მდივანი, პიტ ჰეგსეთი შეხვედრას ვიდეოკავშირის საშუალებით დაესწრება. მანამდე ვრცელდებოდა ინფორმაცია, რომ შეხვედრა აშშ-ის წარმომადგენლის მონაწილეობის გარეშე გაიმართებოდა. შეხვედრას ონლაინ ფორმატში დაესწრება უკრაინის პრეზიდენტი, ვოლოდიმირ ზელენსკიც.
