ანკარაში ანდრეი სიბიგას მარკო რუბიოს და ლინდსი გრეჰემის შეხვედრა გაიმართა
15.05.2025 ნახვები: 351
უკრაინის საგარეო საქმეთა მინისტრი, ანდრეი სიბიგა აშშ-ის სახელმწიფო მდივანს, მარკო რუბიოს და სენატორ ლინდსი გრეჰემს ანკარაში შეხვდა, რათა სამშვიდობო ძალისხმევა განეხილათ და ამ საკითხთან დაკავშირებით პოზიციები შეეთანხმებინათ.
ინფორმაციას სიბიგა სოციალურ პლატფორმა X-ზე ავრცელებს.
„ანტალიაში შევხვდი აშშ-ის სახელმწიფო მდივანს, მარკო რუბიოს და სენატორ ლინდსი გრეჰემს, რათა გამეზიარებინა უკრაინის პრეზიდენტ ვოლოდიმირ ზელენსკის ხედვა სამშვიდობო ძალისხმევის შესახებ და ამ კრიტიკულ კვირაში პოზიციების კოორდინაცია გაგვეწია“, - წერს უკრაინის საგარეო უწყების ხელმძღვანელი.
მისი თქმით, შეხვედრისას დეტალურად განიხილეს შემდგომი ნაბიჯების ლოგიკა და ერთმანეთს მიდგომები გაუზიარეს.
„კიდევ ერთხელ დავადასტურე უკრაინის მტკიცე და თანმიმდევრული ერთგულება პრეზიდენტ ტრამპის სამშვიდობო ძალისხმევის მიმართ და მადლობა გადავუხადე შეერთებულ შტატებს ჩართულობისთვის. მზად ვართ, გავაგრძელოთ ჩვენი თანამშრომლობა კონსტრუქციული და ორმხრივად სასარგებლო გზით”, - აცხადებს სიბიგა.
მისი თქმით, სასიცოცხლოდ მნიშვნელოვანია, რომ რუსეთმა უკრაინის კონსტრუქციული ნაბიჯების შესაბამისად იმოქმედოს.
„მას ეს ჯერ კიდევ არ გაუკეთებია. მოსკოვმა უნდა გაიგოს, რომ მშვიდობის უარყოფას თავისი ფასი აქვს“, - წერს სიბიგა.
შეგახსენებთ, დღეს თურქეთში უკრაინასა და რუსეთს შორის მოლაპარაკებები გაიმართება. უკრაინის დელეგაციაში შედიან : პრეზიდენტი ვოლოდიმირ ზელენსკი, საგარეო საქმეთა მინისტრი ანდრეი სიბიგა, თავდაცვის მინისტრი რუსტემ უმეროვი, პრეზიდენტის ადმინისტრაციის ხელმძღვანელი ანდრეი ერმაკი და ვოლოდიმირ ზელენსკის მრჩეველი დიპლომატიურ საკითხებში იგორ ჟოვკვა. ანდრეი სიბიგა უკვე თურქეთში იმყოფება.
