„ერთიანობა - ნაციონალური მოძრაობის“ გენერალური მდივნის, პეტრე ცისკარიშვილის შეფასებით, „თანაინვესტირების ფონდის“ ყოფილი გენერალური დირექტორი, „გიორგი ბაჩიაშვილი ივანიშვილის ვერდიქტის მსხვერპლია“.
როგორც ცისკარიშვილმა ჟურნალისტებს განუცხადა, „გიორგი ბაჩიაშვილს ციხეში მხოლოდ იმიტომ სვამენ, რომ ბიძინა ივანიშვილმა ფული გამოსძალოს“.
„ბიძინა ივანიშვილის გადაწყვეტილებით ხალხი ციხეში მიდის, ბაჩიაშვილიც ივანიშვილის ვერდიქტის მსხვერპლია. ეს ადამიანი არის არა მხოლოდ პოლიტიკური პატიმარი, არამედ მეწარმე, რომელსაც ფული უნდა გამოსძალონ. ამ მიზნით სვამენ ციხეში, ტყვედ აჰყავთ იმისთვის, რომ ის თანხა, რასაც ივანიშვილი მას ედავება, პატიმრობის პირობებში გამოსძალოს. ასეთ ქვეყანაში ვცხოვრობთ. თუ ბაჩიაშვილს რამე დანაშაული აქვს ჩადენილი, ე.ი. ივანიშვილსაც ჩადენილი აქვს, ერთად აკეთებდნენ ე.წ. მაინინგს, ერთად გამოიმუშავებდნენ ბიტკოინებს, ერთად შოულობდნენ ფულს. ვინ არის მტყუან-მართალი, ამას ამ სასამართლოს პირობებში ვერ გავარკვევთ, ამის არავის სჯერა. ამ ადამიანს ციხეში მხოლოდ იმიტომ სვამენ, რომ ივანიშვილმა ფული გამოსძალოს“, - განაცხადა პეტრე ცისკარიშვილმა.
ცნობისთვის, სახელმწიფო უსაფრთხოების სამსახურის ინფორმაციით, სუს-მა 2025 წლის 26 მაისს განხორციელებული ანონიმური შეტყობინებით წითელი ხიდისა და სადახლოს შორის არსებული ე.წ. მწვანე საზღვრის მონაკვეთის მიმდებარედ წითელი ცირკულარით ძებნილი და მსჯავრდებული გიორგი ბაჩიაშვილი დააკავა.
„თანაინვესტირების ფონდის" ყოფილი გენერალური დირექტორი, "ქართული ოცნების“ დამფუძნებლის, ბიძინა ივანიშვილის კრიპტოვალუტის მითვისებაშია მსჯავრდებული და მას 11 წლით თავისუფლების აღკვეთა აქვს მისჯილი. ამასთან, მას ბრალი წარდგენილი აქვს სისხლის სამართლის კოდექსის 344-ე მუხლის პირველი ნაწილით, რაც საზღვრის უკანონოდ გადაკვეთას გულისხმობს.
ბაჩიაშვილს ბრალი აქვს წარდგენილი "მტკვარი ჰესის" საქმეზეც საქართველოს სსკ-ის 2201-ე მუხლის მე-2 ნაწილით, რაც სპეციალური უფლებამოსილების მქონე პირის მიერ სამსახურებრივი მოვალეობის შეუსრულებლობას ან არაჯეროვნად შესრულებას გულისხმობს, რამაც მძიმე შედეგი გამოიწვია. წარდგენილი ბრალდება სასჯელის სახედ და ზომად 2-დან 5- წლამდე თავისუფლების აღკვეთას ითვალისწინებს.
