მარკო რუბიომ სერგეი ლავროვს შეახსენა ტრამპის პოზიცია რუსეთსა და უკრაინას შორის პირდაპირი მოლაპარაკებების გაგრძელების აუცილებლობის შესახებ

ამერიკის სახელმწიფო მდივანი მარკო რუბიო  ტელეფონით ესაუბრა რუსეთის საგარეო საქმეთა მინისტრ სერგეი ლავროვს. როგორც სახელმწიფო დეპარტამენტის წარმომადგენელმა ტემი ბრიუსმა განაცხადა, საუბარი რუსეთის თხოვნით გაიმართა.

მარკო რუბიომ კიდევ ერთხელ დაადასტურა პრეზიდენტ დონალდ ტრამპის პოზიცია – მხარეებმა უნდა გააგრძელონ პირდაპირი მოლაპარაკებები, რათა მოხდეს რუსეთისა და უკრაინის შორის მდგრადი მშვიდობის მიღწევა.

„სახელმწიფო მდივანმა მარკო რუბიომ დღეს რუსეთის საგარეო საქმეთა მინისტრ ლავროვთან ისაუბრა რუსეთის თხოვნით. მდივანმა რუბიომ კიდევ ერთხელ გაიმეორა პრეზიდენტ ტრამპის მოწოდება რუსეთსა და უკრაინას შორის პირდაპირი მოლაპარაკებების გაგრძელების შესახებ, რათა მიღწეულ იქნას ხანგრძლივი მშვიდობა“, - განაცხადა აშშ-ის სახელმწიფო დეპარტამენტის პრესსპიკერმა ტემი ბრიუსმა.

საუბრის შინაარსის შესახებ სხვა დეტალები ჯერჯერობით არ გავრცელებულა.