რასა იუკნევიჩიანე ევროპარლამენტში მივიდა მაისურით, რომელზეც მზია ამაღლობელის ფოტო იყო დაბეჭდილი
04.06.2025 ნახვები: 411
ევროპარლამენტარი რასა იუკნევიჩიანე ევროპარლამენტის საგარეო საქმეთა კომიტეტის სხდომაზე მაისურით მივიდა, რომელზეც „ბათუმელების“ დამფუძნებლის, მზია ამაღლობელის ფოტო იყო დაბეჭდილი და დატანებული ჰქონდა ამაღლობელისვე ფრაზა: „იბრძოლეთ, სანამ ძალიან გვიან არ არის“.
რასა იუკნევიჩიანემ სხდომაზე საქართველოს შესახებ ანგარიშის პროექტი წარადგინა.
მისი თქმით, ანგარიშში საუბარია გაყალბებულ არჩევნებზე, მმართველი პარტიის გადაწყვეტილებაზე დაბლოკოს ევროკავშირში გაწევრიანების გზა, ჟურნალისტებისა და ოპოზიციონერი პოლიტიკოსების დაკავებაზე, ევროკავშირსა და მის წარმომადგენლებზე თავდასხმებზე. ანგარიში მხარს უჭერს ახალ სამართლიან არჩევნებს, რეჟიმის წინააღმდეგ სანქციების დაწესებას და მოითხოვს პოლიტიკური პატიმრების გათავისუფლებას და ევროკავშირის მხარდაჭერის გადახედვას.
კომიტეტმა ანგარიშის პროექტი 55 ხმით დაამტკიცა.
