ეკონომიკის პროფესორი და გერმანიის ქრისტიანულ-დემოკრატიული კავშირის (CDU) წევრი არჩილ იაკობაშვილი პარლამენტის თავმჯდომარის, შალვა პაპუაშვილის განცხადებას ეხმაურება, რომელშიც პაპუაშვილი ევროკავშირში კონსენსუსის წესის შესაძლო შეცვლას მცირე სახელმწიფოების სუვერენიტეტისთვის საფრთხედ აფასებს.
პაპუაშვილის განცხადებით, თუ ევროკავშირში გადაწყვეტილებების კონსენსუსით მიღების წესი გაუქმდება, კავშირი „თანასწორ წევრთა გაერთიანებიდან დიდი სახელმწიფოების მიერ მართულ სისტემად გადაიქცევა“, რაც, მისი შეფასებით, პატარა ქვეყნებს საკუთარი ეროვნული ინტერესების დაცვის უმთავრეს ბერკეტს წაართმევს და ევროკავშირის გაფართოებასაც კითხვის ნიშნის ქვეშ დააყენებს.
ამ განცხადების საპასუხოდ არჩილ იაკობაშვილი წერს, რომ ევროკავშირის შესახებ მსგავსი შეფასებები რეალობას არ შეესაბამება და რუსეთის ნარატივს იმეორებს.
მისი განმარტებით, ევროკავშირში გადაწყვეტილებების მიღება მხოლოდ კონსენსუსის პრინციპზე არ არის დაფუძნებული. იაკობაშვილი აღნიშნავს, რომ თუ ერთსულოვნების წესი გარკვეულ სფეროებში შეიცვლება, ძალაში დარჩება ორმაგი უმრავლესობის მექანიზმი, რომელიც ლისაბონის ხელშეკრულებით 2014 წლიდან მოქმედებს და გადაწყვეტილების მისაღებად წევრი სახელმწიფოების 55%-ისა და ევროკავშირის მოსახლეობის 65%-ის მხარდაჭერას ითვალისწინებს.
პროფესორის თქმით, ევროკავშირის არსებობას საფრთხე არ ემუქრება, სანამ მისი დამფუძნებელი სახელმწიფოები — გერმანია, საფრანგეთი და იტალია — კავშირის ერთიანობის შენარჩუნებას უჭერენ მხარს.
იაკობაშვილი ასევე აღნიშნავს, რომ ევროკავშირსა და ევროპის თავისუფალი ვაჭრობის ასოციაციას (EFTA) შორის დღესაც მოქმედებს „ოთხი თავისუფლების“ პრინციპი და ევროკავშირის შემადგენლობაში ცვლილებები ავტომატურად არ ნიშნავს ევროპული ინტეგრაციის დასრულებას.
„გაიგეს ოფიციალურმა პარიზმა და ბერლინმა, რომ „ქართულ ოცნებას“ არ უნდა ევროკავშირი და მორჩა ამით. რომ არ ხართ მზად ევროპული კონკურენციისთვის — ჩაეხუტეთ ყირგიზეთს და ბაშკირეთს და იყავით“, — წერს იაკობაშვილი.
მისივე შეფასებით, ევროკავშირი „იდეაა და არა ტერიტორია“, ხოლო სრული კონსენსუსის წესი ძირითადად საგარეო პოლიტიკისა და გაფართოების საკითხებზე ვრცელდება. იაკობაშვილი აცხადებს, რომ ევროკავშირის შიდა გადაწყვეტილებების მნიშვნელოვანი ნაწილი უკვე წლებია ორმაგი უმრავლესობის წესით მიიღება და მიიჩნევს, რომ ევროკავშირის შესაძლო რეფორმებზე აპოკალიფსური შეფასებები სამართლებრივ რეალობას არ ასახავს.
პარლამენტის თავმჯდომარე შალვა პაპუაშვილი კი აცხადებს, რომ კონსენსუსის პრინციპის შესუსტება ევროკავშირს თანასწორ წევრთა გაერთიანებიდან დიდი სახელმწიფოების მიერ მართულ სისტემად გადააქცევს და მცირე ქვეყნებისთვის წევრობის პოლიტიკურ და სამართლებრივ მნიშვნელობას არსებითად შეამცირებს.
