ქალების საშუალო ხელფასი 559,2 ლარით ნაკლებია კაცების საშუალო ხელფასზე

2020 წლის IV კვარტალში ქალების საშუალო ხელფასი 559,2 ლარით ნაკლები იყო კაცების საშუალო ხელფასზე.

საქსტატის ინფორმაციით, 2020 წლის IV კვარტალში ქალების საშულო ხელფასი 1 022.3 ლარით, ხოლო კაცების - 1 581.5 ლარით განისაზღვრა.

ხელფასების წლიურმა ზრდამ ქალებში 3.8 ლარი შეადგინა, ხოლო კაცებში აღნიშნული მაჩვენებელი შემცირდა 11.7 ლარით. საქმიანობის სახეების მიხედვით კაცების ხელფასი თითქმის ყველა სექტორში აღემატებოდა ქალების ხელფასს.

2020 წლის მე-4 კვარტალში საქართველოში საშუალო თვიური ნომინალური ხელფასი გასული წლის შესაბამის პერიოდთან შედარებით 0.4 პროცენტით (5 ლარით) შემცირდა და 1 314.7 ლარი შეადგინა. შესაბამისი მონაცემები საქსტატის მიერ გამოქვეყნებულ ანგარიშშია („დაქირავებით დასაქმებულთა საშუალო თვიური ნომინალური ხელფასი") აღნიშნული.

„საქსტატის" ცნობით, საქმიანობების სახეების მიხედვით შედარებით მაღალი ხელფასი დაფიქსირდა შემდეგ დარგებში:

ინფორმაცია და კომუნიკაცია - 2 199.8 ლარი (წინა წლის შესაბამის პერიოდთან შედარებით გაიზარდა 6.2 პროცენტით);

მშენებლობა - 2 061.8 ლარი (გაიზარდა 1.2 პროცენტით);

პროფესიული, სამეცნიერო და ტექნიკური საქმიანობები - 2 020.9 ლარი (წინა წლის შესაბამის პერიოდთან შედარებით შემცირდა 8.8 პროცენტით);

საფინანსო და სადაზღვევო საქმიანობები - 2 017.2 ლარი (წინა წლის შესაბამის პერიოდთან შედარებით გაიზარდა 4.2 პროცენტით).