ევროპის საბჭოს საპარლამენტო ასამბლეის „სოციალისტების, დემოკრატებისა და მწვანეების“ (SOC) პოლიტიკური ჯგუფი აცხადებს, რომ რუსეთმა საქართველოს ოკუპირებული ცხინვალის რეგიონის დე ფაქტო ანექსიისკენ მიმართული ძალისხმევა გააძლიერა.
ჯგუფის განცხადებით, მსგავსი ანექსია საერთაშორისო სამართლის, საქართველოს სუვერენიტეტისა და ტერიტორიული მთლიანობის „უხეში და მიუღებელი დარღვევა“ იქნება.
„ეს მოსკოვის იმ ფართო სტრატეგიის ნაწილია, რომელიც მიზნად ისახავს მეზობელი სახელმწიფოების ტერიტორიებზე კონტროლის დამყარებას, მათ შორის უკრაინის დონბასსა და ყირიმში, მოლდოვის დნესტრისპირეთში და საქართველოს აფხაზეთში“, — ნათქვამია განცხადებაში.
SOC ჯგუფი ხაზს უსვამს, რომ სამხრეთ ოსეთის საკითხი მხოლოდ საქართველოს უსაფრთხოებას არ ეხება და ქვეყნის ტერიტორიული მთლიანობის დაცვას მთლიანად ევროპის უსაფრთხოებისთვის არსებითი მნიშვნელობა აქვს.
„კავკასიასა და მთელ ევროპაში ხანგრძლივი სტაბილურობისა და უსაფრთხოების მიღწევა შესაძლებელია მხოლოდ ყოველი სახელმწიფოს სუვერენიტეტისა და ტერიტორიული მთლიანობის პატივისცემით“, — ნათქვამია განცხადებაში.
SOC ევროპის საბჭოს საპარლამენტო ასამბლეის პოლიტიკური ჯგუფია, რომელიც საკუთარ ძირითად ღირებულებებად დემოკრატიას, თავისუფლებას, თანასწორობას, სამართლიანობასა და სოლიდარობას ასახელებს.
