პრემიერ-მინისტრი ირაკლი კობახიძე აცხადებს, რომ სუს-ის ყოფილ უფროს გრიგოლ ლილუაშვილს შეუძლია ისაუბროს ყველაფერზე, რაზეც სურს, რადგან ეს ნებისმიერი პატიმრის უფლებაა.
კობახიძეს ჟურნალისტებმა ჰკითხეს, ელის თუ არა 13 წლით თავისუფლების აღკვეთილი ლილუაშვილის „ალაპარაკებას“.
„ილაპარაკოს, რაც უნდა, ეს ნებისმიერი პატიმრის უფლებაა. საქართველოში დემოკრატია და სიტყვის თავისუფლება უზრუნველყოფილია“, — განაცხადა კობახიძემ.
პრემიერის თქმით, წარსულშიც ყოფილა შემთხვევები, როდესაც კორუფციული დანაშაულისთვის პატიმრობაში მყოფ ყოფილ მაღალჩინოსნებს ხელისუფლების წინააღმდეგ განცხადებები გაუკეთებიათ, თუმცა, მისი შეფასებით, ამას შედეგი არ მოჰყოლია.
„მათ რაღაცების ლაპარაკი სცადეს, თუმცა ჩვენი ხელისუფლება იმდენად სუფთად მუშაობს, რომ ამ ლაპარაკს არასდროს რაიმე შედეგი არ მოჰყოლია. იმდენად სუფთაა ჩვენი საქმიანობა და წესები, რომ ხელისუფლებაზე ვერაფერი ვერ თქვეს“, — აღნიშნა კობახიძემ.
მან ამ კონტექსტში პატიმრობაში მყოფი ყოფილი პრემიერ-მინისტრი ირაკლი ღარიბაშვილიც ახსენა და განაცხადა, რომ მსგავსი „საუბრები და სპეკულაციები“ ხელისუფლების საქმიანობაზე გავლენას ვერ ახდენს.
„აქ მათ შორის ვგულისხმობ ირაკლი ღარიბაშვილს და არა მარტო მას [...] ჩვენი ხელისუფლება იმდენად სუფთად მუშაობს, ასეთ საუბრებსა და სპეკულაციებს შედეგი არასდროს არა აქვს“, — განაცხადა ირაკლი კობახიძემ.
