არჩილ თალაკვაძე - ანდრიუს კუბილიუსი და რასა იუკნევიჩიენე გულშემატკივრობენ ყველაზე ანტიევროპულ პარტიას, „ნაციონალურ მოძრაობას“

ორი ევროპარლამენტარი – ბატონი კუბილიუსი და ქალბატონი იუკნევიჩიენე საქართველოში უკვე წლებია, გულშემატკივრობენ ყველაზე ანტიევროპულ პოლიტიკურ პარტიას, „ნაციონალურ მოძრაობას“, – განაცხადა პარლამენტის თავმჯდომარის მოადგილე არჩილ თალაკვაძემ.

თალაკვაძის თქმით, მათი განცხადებები არ უნდა გავაიგივოთ ევროპარლამენტის და ევროკავშირის საერთო პოზიციასთან.

„გუშინ, როდესაც მათ ეს განცხადებები გააკეთეს, პრაქტიკულად პირდაპირ მოუწოდეს საქართველოს მოსახლეობას ლეგიტიმურად არჩეული ხელისუფლების წინააღმდეგ სამოქმედოდ, ეს არის ჩვენს შიდა პოლიტიკაში უხეში ჩარევა და რაც ეწინააღმდეგება ევროკავშირის ძირეულ პრინციპებსა და ფუნდამენტურ ღირებულებებს. ევროკავშირმა და ევროპარლამენტმა გააკეთეს საერთო განცხადება, სადაც მხარი დაუჭირეს საქართველოს ევროინტეგრაციას. ამით ყველაფერი ნათქვამია. ეს ორი ადამიანი სრულიად საპირისპირო განცხადებით გამოვიდა. იმავე დღეს ევროპარლამენტმა მხარი დაუჭირა საქართველოს ევროპულ ინტეგრაციას. შესაბამისად, ჩვენს საზოგადოებას არ უკვირს ამ ადამიანების განცხადებები. ისინი მხარს უჭერენ საქართველოში ყველაზე ანტიევროპულ პარტიას, „ნაციონალურ მოძრაობას“, რომელიც ბრალდებული, მსჯავრდებული და პოლიტიკურად პასუხისმგებელი იყო ყველა ევროპული ღირებულების ფეხქვეშ გათელვაში, მაშინ ეს ადამიანები არ გვინახავს, გამოსულიყვნენ და გაეკეთებინათ განცხადებები სააკაშვილის წინააღმდეგ. დღეს ყველაზე მეტად პასუხისმგებელი პირები ადამიანის უფლებების უხეშ დარღვევებზე გამოჰყავთ, როგორც მსხვერპლი. ეს არის რეალობის გადაკეთების მცდელობა და ჩვენს საზოგადოებას კარგად ესმის, სინამდვილეში რასთან გვაქვს საქმე“, – განაცხადა არჩილ თალაკვაძემ.