ნაციონალური მოძრაობის წევრი ხატია დეკანოიძე ევროპარლამენტში საქართველოს შესახებ გამართულ დებატებს აფასებს და ამბობს, რომ ნათლად გამოჩნდა, თუ რამხელა დარტყმას აყენებს საქართველოს არაფორმალური მმართველობა და პოლიტიკური მართლმსაჯულება.
"გუშინ ევროპარლამენტში საქართველოს ძალიან დიდმა გულშემატკივრებმა, ჩვენმა მეგობრებმა, ქართულ საზოგადოებას, ჩვენს ქვეყანას და ევროპას, აჩვენეს ის, თუ რამდენად მძიმე მდგომარეობაშია საქართველოში დემოკრატია და ზუსტად რამხელა დარტყმას აყენებს დემოკრატიას არაფორმალური მმართველობა და ბიძინა ივანიშვილის ხელისუფლება, რომელმაც მოახერხა ის, რომ მთელი ევროპა, ევროკავშირი, ამ ძალიან მნიშვნელოვანი გადაწყვეტილების მიჯნაზე, როდესაც საქართველო ელოდება სტატუსს უკრაინასა და მოლდოვასთან ერთად, ევროპარლამენტარები მსჯელობენ საქართველოში მედიის თავისუფლებაზე, პოლიტიკურ მართლმსაჯულებაზე"- თქვა დეკანოიძემ.
მისივე შეფასებით, ქართულ ოცნებას რამდენიმე კვირა დარჩა იმისთვის, რომ არსებული ვითარება მეტნაკლებად შეცვალოს და გადადგას ნაბიჯები პოლიტიკური მართლმსაჯულების გამოსწორებისკენ. დეკანოიძის თქმით, მომდევნო ორი კვირა ახლა ყველაზე მნიშვნელოვანია.
"მათ თქვეს, რომ მიუხედავად იმისა, რომ ისინი ემხრობიან საქართველოსთვის კანდიდატის სტატუსის მინიჭებას, თუ საქართველო დარჩება ევროპის ღია კარს მიღმა, მთელი პასუხისმგებლობა დაეკისრება საქართველოს ხელისუფლებას. ეს არის უმნიშვნელოვანესი დრო - ორი კვირა, 24 ივნისამდე, როდესაც საქართველოს ხელისუფლებამ უნდა გაიაზროს, რომ პირველად ევროპარლამენტში საქართველოს ხელისუფლება და არაფორმალური მმართველობა ევროინტეგრაციის კუთხით ყველაზე დიდი შემაფერხებელია და ამაზე საუბრობდნენ ჩვენი მეგობრები"- თქვა დეკანოიძემ.
ევროპარლამენტში საქართველოში მედიის თავისუფლებასთან დაკავშირებით რეზოლუციას განიხილავენ, რომელსაც კენჭს 9 ივნისს უყრიან.
გუშინ გამართული დებატების დროს ევროპარლამენტში განაცხადეს, რომ საქართველოში დემოკრატიის უკუსვლაა.
