„ერთიანი ნაციონალური მოძრაობის“ ერთ-ერთი ლიდერი, 4 ოქტომბრის საპროტესტო აქციის საქმეზე მსჯავრდებული ირაკლი ნადირაძე აცხადებს, რომ ხელისუფლებასთან საპროცესო შეთანხმებასა და შეწყალების თხოვნას არ განიხილავს.
პატიმრობაში მყოფი პოლიტიკოსი სოციალურ ქსელში გავრცელებულ განცხადებაში აღნიშნავს, რომ შვიდწლიანი სასჯელიდან ერთი წელი უკვე მოიხადა, თუმცა საკუთარი პოლიტიკური პოზიციის შეცვლას არ აპირებს.
„ჩემი პოზიცია ამ საკითხთან დაკავშირებით ისედაც იცით, მაგრამ კიდევ ერთხელ დავწერ: ივანიშვილის რუსულ, ავტოკრატიულ რეჟიმთან არც საპროცესო შეთანხმებას და არც შეწყალების თხოვნას არათუ არ ვაპირებ, არც კი განვიხილავ! არც ერთი ნაბიჯი უკან და ბრძოლა ბოლომდე!
უსამართლოდ მოსჯილი 7 წლიდან ერთი უკვე გავიდა და დარჩენილ ექვს წელშიც, როგორც შემიძლია და შემეძლება ოთხ კედელში გამოკეტილ ადამიანს, ბოლომდე გავაგრძელებ ბრძოლას თქვენთან ერთად ჩვენი ქვეყნის ღირსებისთვის, თავისუფლებისთვის და ევროპული მომავლისთვის!
ბოლოს მაინც ჩვენ მოვიგებთ! ძალა ერთობაშია! მიყვარხართ ყველა და დიდი მადლობა ჩემი, ჩემი ოჯახის და შვილების გვერდში დგომისთვის და მხარდაჭერისთვის“, – წერს ირაკლი ნადირაძე.
