ზელენსკი: რუსეთში ვიზიტის შემდეგ ამერიკულმა დელეგაციამ მნიშვნელოვანი შედეგი ჩამოიტანა
დავით ფეიქრიშვილზე თავდასხმის საქმეზე პენიტენციური სამსახურის ყოფილ ხელმძღვანელებსა და ხუთ პატიმარს ბრალდება წარუდგინეს
მეუფე გიორგი ჯამდელიანი ლაშა ნაცვლიშვილს: საჯაროდ მოიხადეთ ბოდიში და მეუფე იობის წინაშე შენდობა ითხოვეთ
ელენე ხოშტარია: რუსეთის თავდაცვის სამინისტრო საქართველოს მოქალაქეების ომში ჩასართავად რეკლამებს ავრცელებს, ხელისუფლება კი დუმს
ხვიჩა კვარაცხელია მერაბ დვალიშვილსა და საბა ლაზიშვილზე თავდასხმაზე: ლაჩრულად, ზურგიდან მიპარვით შეეცადნენ თქვენს დაჩაგვრას — ქართველებთან ეს არასდროს გამოუვათ
პროკურორი დავით ფეიქრიშვილის განცხადებაზე: ტელეფონები დალუქული იყო, პროკურორს მათთან შეხება არ ჰქონია
საერთო ისტორია და კულტურული კავშირები: ექსპერტებმა ქართულ-რუსული ურთიერთობები განიხილეს
ევა გოცირიძე „ქართულ ოცნებას“: თუ ოპოზიციური პარტიები ისედაც მილევად რეჟიმში არიან, რაში გვჭირდება მათი აკრძალვა?

ირაკლი კობახიძე: დაახლოებით ორი წლის განმავლობაში კორუფციულმა პრობლემებმა სისტემური ხასიათი მიიღო, დღეს კი კორუფცია პრინციპულად აღმოფხვრილია

ნახვები: 367 ირაკლი კობახიძე: დაახლოებით ორი წლის განმავლობაში კორუფციულმა პრობლემებმა სისტემური ხასიათი მიიღო, დღეს კი კორუფცია პრინციპულად აღმოფხვრილია
 

პრემიერ-მინისტრ ირაკლი კობახიძის განცხადებით, საქართველოში დაახლოებით ორი წლის განმავლობაში კორუფციულმა პრობლემებმა სისტემური ხასიათი მიიღო, თუმცა ხელისუფლების მიერ განხორციელებული ღონისძიებების შედეგად, დღეს სახელმწიფო უწყებებსა და საწარმოებში კორუფცია, მისი შეფასებით, პრაქტიკულად აღმოფხვრილია.

როგორც კობახიძემ ჟურნალისტებთან საუბრისას აღნიშნა, პრემიერ-მინისტრის თანამდებობის დაკავების შემდეგ დაახლოებით წელიწადნახევარი დასჭირდა სახელმწიფო სისტემაში არსებული ვითარების შესწავლას, პრობლემების გამოვლენასა და შესაბამისი ცვლილებების განხორციელებას. მისივე თქმით, ეს პროცესი 2025 წლის ივნისში დასრულდა.

პრემიერ-მინისტრის განმარტებით, კორუფციული პრობლემების გამოვლენის შემდეგ ხელისუფლებამ შესაბამისი რეაგირება დაიწყო, რასაც წინ უძღოდა „ქართული ოცნების“ საპატიო თავმჯდომარის, ბიძინა ივანიშვილის განცხადებაც.

„დაახლოებით ორწლიანი პერიოდი იყო, როდესაც გარკვეული სუბიექტური, არასწორი მოქმედებების გამო თავი კორუფციულმა პრობლემებმა იჩინა. როგორც კი ასეთი პრობლემები სისტემური სახით გამოვლინდა, ჩვენ მაშინვე ჩავერიეთ. ძალიან მკაფიო მინიშნება გაკეთდა ბიძინა ივანიშვილის მხრიდანაც, რომ არსებობდა პრობლემები, რომელთა დაძლევა და მოგვარება იყო საჭირო“, – განაცხადა კობახიძემ.

მისი თქმით, აღნიშნულ პერიოდში ხელისუფლების ყურადღების მნიშვნელოვანი ნაწილი გარე საფრთხეებთან გამკლავებაზე იყო მიმართული, რამაც შიდა პრობლემებზე ერთდროულად კონცენტრირება გაართულა.

„ჩვენ იმდენად ვიყავით დაკავებული თავდაცვით იმ თავდასხმების მიმართ, რაც გარედან ხორციელდებოდა, რომ ერთდროულად რამდენიმე მიმართულებით ყველაფერზე კონცენტრირება რთული იყო“, – აღნიშნა პრემიერ-მინისტრმა.

კობახიძის მტკიცებით, ამჟამად სახელმწიფო საკმარისად ძლიერია იმისთვის, რომ ერთდროულად გაუმკლავდეს როგორც საგარეო გამოწვევებს, ისე ქვეყნის შიგნით არსებულ პრობლემებს.

„დღეს სახელმწიფო ძლიერია, ისე როგორც არასდროს და შეგვიძლია თანაბრად ვიყოთ კონცენტრირებული როგორც გარე თავდასხმების მოგერიებაზე, ასევე ქვეყნის შიგნით კორუფციასთან ბრძოლაზე“, – განაცხადა მან.

პრემიერ-მინისტრის შეფასებით, კორუფცია აღმოფხვრილია ხელისუფლების ზედა ეშელონებში, წამყვან სახელმწიფო უწყებებსა და სახელმწიფო საწარმოებში. ამასთან, მან აღნიშნა, რომ ქვედა დონეზე კორუფციის წინააღმდეგ ბრძოლა მუდმივ ყურადღებას საჭიროებს.

„კორუფცია პრინციპულად აღმოფხვრილია არა მხოლოდ ზედა ეშელონებში, ასევე წამყვან სახელმწიფო უწყებებში და სახელმწიფო საწარმოებში. რაც შეეხება ქვედა დონის კორუფციას, აქ ნებისმიერ ქვეყანაში მუდმივი ბრძოლაა საჭირო“, – განაცხადა კობახიძემ.

პრემიერ-მინისტრმა ასევე აღნიშნა, რომ თუ წარსულში გამოვლენილ შესაძლო კანონდარღვევებთან დაკავშირებით დამატებითი გამოძიების ჩატარების საფუძველი არსებობს, შესაბამის რეაგირებას უფლებამოსილი საგამოძიებო უწყებები მოახდენენ.

კობახიძეს არ დაუკონკრეტებია, კონკრეტულად რომელ სახელმწიფო უწყებებში გამოვლინდა აღნიშნული ორწლიანი პერიოდის განმავლობაში სისტემური კორუფციული პრობლემები ან რა მონაცემებს ეფუძნება მისი შეფასება, რომ დღეს კორუფცია სახელმწიფო სისტემაში პრაქტიკულად აღმოფხვრილია.

ყველას ნახვა
ყველას ნახვა
ყველას ნახვა