ევროკავშირი უკრაინისთვის საგანგებო დაფინანსების მექანიზმს აამოქმედებს, რათა ქვეყანამ რუსეთის თავდასხმების შედეგად დაზიანებული ენერგეტიკული და კომუნალური ინფრასტრუქტურის საჭიროებებისთვის დახმარება სწრაფად მიიღოს. ამის შესახებ უკრაინის პრეზიდენტმა ვოლოდიმირ ზელენსკიმ ევროკომისიის პრეზიდენტ ურსულა ფონ დერ ლაიენთან საუბრის შემდეგ სოციალურ ქსელში განაცხადა.
ზელენსკის თქმით, რუსეთის თავდასხმების შედეგად უკრაინის არაერთ ქალაქში ელექტროენერგიის, წყლისა და გათბობის მიწოდების მხრივ მძიმე მდგომარეობაა. განსაკუთრებით რთული ვითარებაა კიევში, დნეპროპეტროვსკის, სუმისა და დონეცკის ოლქებში, ასევე ხერსონში.
„ურსულას გავაცანი არსებული გამოწვევები და შევთანხმდით, რომ ევროკავშირი სპეციალურ საგანგებო მექანიზმს აამოქმედებს. ეს შესაძლებელს გახდის, უკრაინას სწრაფად გამოეყოს დაფინანსება იმ ყველაზე გადაუდებელი საჭიროებებისთვის, რომლებიც ქვეყანას ამჟამად აქვს. ჩვენი გუნდები ამ საკითხზე უკვე მუშაობენ“, – განაცხადა ზელენსკიმ.
მისი ინფორმაციით, მხარეებმა ზამთრისთვის მოსამზადებლად დამატებითი ენერგეტიკული და ჰუმანიტარული დახმარების საკითხებიც განიხილეს.
საუბარი შეეხო უკრაინის ევროკავშირში გაწევრიანების პროცესსაც. ზელენსკიმ აღნიშნა, რომ ევროკომისიის გაფართოების ყოველწლიურ ანგარიშში უკრაინის პროგრესი დადებითად შეფასდა და მნიშვნელოვანია მოლაპარაკებების ყველა კლასტერის გახსნა და შესაბამისი თავების დახურვის პროცესის დაწყება.
ამასთან, ზელენსკიმ და ფონ დერ ლაიენმა აბუ-დაბიში დაგეგმილ სამმხრივ სამშვიდობო მოლაპარაკებებთან დაკავშირებით პოზიციები შეაჯერეს.
„ბოლო დღეებში ბრიუსელში მოლაპარაკებები გაიმართა, სადაც ჩვენმა გუნდებმა ნაყოფიერად იმუშავეს აღდგენის გეგმასა და ევროპის მხრიდან უსაფრთხოების გარანტიებზე. ურსულასთან ერთად ასევე შევაჯერეთ პოზიციები აბუ-დაბიში დაგეგმილ შეხვედრასთან დაკავშირებით. ყველაფერს ვაკეთებთ იმისათვის, რომ სამმხრივმა ფორმატმა შედეგი გამოიღოს“, – წერს უკრაინის პრეზიდენტი.
