მე მინდა, დიახ, რომ ხალხს დავამახსოვრდე როგორც სახალხო დამცველი, რომელიც იცავდა მიხეილ სააკაშვილის და ნებისმიერი სხვა ადამიანის უფლებებსაც, რომლის დაცვაც შეიძლება, მმართველი პოლიტიკური ძალისთვის არ იყო მისაღები და სასიამოვნო, – ამის შესახებ სახალხო დამცველმა ნინო ლომჯარიამ პარლამენტში განაცხადა.
ლომჯარიამ უპასუხა საპარლამენტო უმრავლესობის წევრის, ნინო წილოსანის კითხვას, რომ „სახალხო დამცველის ინსტიტუტი პირადი პოლიტიკური პრეფერენციების გამოსახატად აქციეთ და ხალხს თავი არა სახალხო დამცველად, არამედ სააკაშვილის დამცველად უფრო დაამახსოვრეთ. შეგვიძლია, ამაზე გამოკითხვაც ჩავატაროთ“.
ლომჯარიას განცხადებით, გამოკითხვები ჩატარებულია და ალბათ შედეგებიც ცნობილია, თუ რამხელა ნდობა აქვს როგორც სახალხო დამცველის ინსტიტუტს, ასევე პირადად სახალხო დამცველს.
„თქვენ თქვით, რომ საზოგადოებას დავამახსოვრდები როგორც სააკაშვილის სახალხო დამცველი და თუ გინდათ, გამოკითხვა ჩავატაროთ ამ საკითხთან დაკავშირებითო. გამოკითხვები პრინციპში ჩატარებულია და ალბათ ეს შედეგებიც იცით, თუ რამხელა ნდობა აქვს როგორც სახალხო დამცველის ინსტიტუტს, ასევე პირადად სახალხო დამცველს. დარწმუნებული ვარ, ამის შესახებ კარგად ხართ ინფორმირებული. დიახ, მე მინდა, რომ დავამახსოვრდე როგორც სახალხო დამცველი, რომელიც იცავდა მიხეილ სააკაშვილის უფლებებსაც და ნებისმიერი სხვა ადამიანის უფლებებსაც, რომლის დაცვაც შეიძლება, მმართველი პოლიტიკური ძალისთვის არ იყო მისაღები და სასიამოვნო. დიახ, მე მინდა დავამახსოვრდე როგორც სახალხო დამცველი, რომელიც იცავდა ყველა იმ პირს, რომლის უფლებების დაცვა არ იყო პოპულარული და რომლის გამოც, სახალხო დამცველი ხდებოდა თავდაცვის ობიექტი. მათ შორის ვიცავდი და დავიცავ ვადის ამოწურვამდე იმ პირებს, რომლებიც ძალიან დიდი ხანი იყვნენ თქვენი გუნდის წევრები, მაგრამ ახლა არ არიან და დღეს მათაც სჭირდებათ დახმარება. მე მგონი, ამ მიმართულებით დისკრიმინაციას ნამდვილად არ ვეწევი“, – განაცხადა ნინო ლომჯარიამ.
