ომში მყოფი ქვეყანა როდესაც შენი ქვეყნის მოქალაქეებს ასანქცირებს, ეს ქვეყანაზე ცუდად აისახება, – ამის შესახებ პარტია „საქართველოსთვის“ წევრმა ანა ბუჩუკურმა განაცხადა.
ბუჩუკურის თქმით, აღნიშნული სანქციების წინაპირობა ხელისუფლების მხრიდან უკრაინის ხელისუფლების წინააღმდეგ თავდასხმები გახდა.
„სანქციების დაწესებაში სასიხარულო არაფერია. ომში მყოფი ქვეყანა როდესაც შენი ქვეყნის მოქალაქეებს ასანქცირებს, ეს ქვეყანაზე ცუდად აისახება. თუმცა ამას წინაპირობები ჰქონდა – ხელისუფლების უმაღლესი თანამდებობის პირების მხრიდან თავდასხმები უკრაინის ხელისუფლების წინააღმდეგ. საერთაშორისო პარტნიორებმა და უკრაინამაც კარგად იციან, ვინ მართავს ხელისუფლებას, ვსაუბრობ ბიძინა ივანიშვილზე. სასიხარულო არაფერია, როდესაც ომში მყოფი ქვეყანა ასანქცირებს შენი ქვეყნის მოქალაქეს, ეს კიდევ უფრო აზიანებს ჩვენი ქვეყნის საერთაშორისო რეპუტაციას, რაც „ქართულმა ოცნებამ“ ბოლო თვეებში ისედაც დააზიანა და ეს ნეგატიურად აისახება ქვეყნების ურთიერთობებზე“, – განაცხადა ბუჩუკურმა.
მისივე თქმით, „ქართული ოცნებისთვის“ ბიძინა ივანიშვილი სახელმწიფოს უტოლდება, რაც მიუღებელია.
„რაც შეეხება ამ საკითხზე „ქართული ოცნებების“ განცხადებებს, ეს „ნაციონალურ მოძრაობასაც“ ახასიათებდა, როდესაც მიხეილ სააკაშვილს სახელმწიფოს უტოლებდა. „ქართული ოცნების“ მესიჯებიც ასეთი იყო, რომ მათთვის სახელმწიფო უდრის ბიძინა ივანიშვილს. ეს დამოკიდებულება კატეგორიულად მიუღებელია“, -აღნიშნა ბუჩუკურმა.
უკრაინის პრეზიდენტის, ვოლოდიმირ ზელენსკის განკარგულებით, საქართველოს ოთხ მოქალაქეს, ალექსანდრე ივანიშვილს, უჩა და ტატე მამაცაშვილებს, ქეთევან ხარაიძეს სანქციები დაუწესდა.
