ის, რაც მაუწყებლის შიდა რეგულირების სფერო იყო, გადააქვთ მარეგულირებელ კომისიაში, რომელიც გამოყენებულია თავისუფალი მედიის წინააღმდეგ - ევრორეკომენდაციის არცერთი ჩანაწერი არ მიგვითითებს, რომ ეს ასე უნდა გავაკეთოთ, - ამის შესახებ ჟურნალისტებთან „ნაციონალური მოძრაობის“ დეპუტატმა დავით კირკიტაძემ „მაუწყებლობის შესახებ“ კანონში ცვლილებებთან დაკავშირებით განაცხადა.
მისი თქმით, “ქართული ოცნების“ მიზანი მედიის შეზღუდვაა.
„მთელი რიგი საკითხები გამოაქვთ მაუწყებლის შიდა რეგულირებიდან და ექცევა მარეგულირებელი კომისიის ქვეშ. კომუნიკაციების მარეგულირებელი კომისია „ქართული ოცნების“ მხრიდან გამოყენებულია როგორც პოლიტიკური ინსტრუმენტი მედიაზე ზეწოლისთვის. ის, რაც მაუწყებლის შიდა რეგულირების სფერო იყო, გადააქვთ მარეგულირებელ კომისიაში, რომელიც გამოყენებულია თავისუფალი მედიის წინააღმდეგ. ევრორეკომენდაციის არცერთი ჩანაწერი, არსად არ მიგვითითებს იმაზე, რომ ეს ასე უნდა გავაკეთოთ. „ქართული ოცნების“ რეალური მიზანია, შემოიტანოს ცენზურა თავისუფალი მედიის წინააღმდეგ, ამას უპირისპირდება დღეს ოპოზიცია პარლამენტის სხდომათა დარბაზში,“ - განაცხადა კირკიტაძემ.
