„ქართული ოცნება" ცდილობს, გადაფაროს, თუ რატომ დაიხია უკან სახელმწიფომ დემოკრატიის განვითარების თვალსაზრისით, ამ მიზანს ემსახურება მათი ბრალდებები, - ამის შესახებ პარტია „საქართველოსთვის" წევრმა, ანა ბუჩუკურმა განაცხადა.
როგორც ანა ბუჩუკური ამბობს, ბოლო ერთი წლის განმავლობაში პერსონალურად ირაკლი კობახიძისგან და „ქართული ოცნებისგან" მათი პარტიის ხელმძღვანელის მიმართ აბსურდულ ბრალდებებს ისმენენ.
„ირაკლი კობახიძეს პასუხი არ აქვს, რატომ არის ქვეყანა ასეთ ცუდ დღეში. ის ქვეყნაში არსებული პრობლემების სამარცხვინო ტყუილებითა და პროპაგანდისტული ბრალდებებით გადაფარვას ცდილობს. დღეს ერთი წელი შესრულდა, რაც გიორგი გახარიამ პრემიერ-მინისტრის თანამდებობა დატოვა. ბოლო ერთი წლის განმავლობაში პერსონალურად ირაკლი კობახიძისგან და „ქართული ოცნებისგან" გვესმის რაღაც აბსურდული ბრალდებები - დაწყებული იმით, რომ ჩვენი გუნდის ლიდერი სახელმწიფო გადატრიალებს აწყობდა. მას ძალოვანი უწყების მოქმედ თანამშრომლებთან ერთად სახელმწიფოს წინააღმდეგ შეთქმულებაში დასდო ბრალი, გაგრძელებული კოკაინშიკობითა და იმის თქმით, თითქოს აშშ-ში მიხეილ სააკაშვილს შეხვდა.
გადატრიალების თაობაზე გაჟღერებულ ბრალდებასთან დაკავშირებით პროკურატურას მივმართეთ, რათა ეს ძალიან მძიმე სისხლის სამართლებრივ პასუხისმგებლობას დაქვემდებარებული ქმედება გამოეძიებინათ, თუმცა პროცესი დღემდე არ დაწყებულა. კოკაინშიკობის ბრალდებასთან დაკავშირებით ირაკლი კობახიძემ თბილისში ჩვენს დეპუტატობის ქალ კანდიდატებს დასდო ბრალი, რომ გახარიას „კოკაინი" მათ მიასაღეს. ჩვენ ამასთან დაკავშირებითაც შევიტანეთ გენერალურ პროკურატურაში შესაბამისი დასაბუთებული განცხადება. მოგეხსენებათ, ნარკოტიკის გასაღება არის სისხლის სამართლის დანაშაული, მოვითხოვეთ გამოძიება. თუ ფაქტი არ დადასტურდებოდა, პასუხისგებაში ირაკლი კობახიძე უნდა მოქცეულიყო ცრუ დასმენისათვის. რა თქმა უნდა, არც ამას მოჰყოლია რეაგირება.
მათი ბრალდებები მხოლოდ ერთ მიზანს ემსახურება - „ქართული ოცნება" ცდილობს, გადაფაროს, თუ რატომ არის ასეთი სუსტი მათი პოლიტიკა, რატომ დაიხია სახელმწიფომ დემოკრატიის განვითარების თვალსაზრისით და რატომ წავიდა საქმე უკან ევროპული გზიდან", - განაცხადა ანა ბუჩუკურმა.
