თეატრალური უნივერსიტეტის სტუდენტები ემიჯნებიან შოთა რუსთაველის თეატრისა და კინოს სახელმწიფო უნივერსიტეტის განცხადებას, რომელშიც ისინი აქციაზე დაზარალებულებს სოლიდარობას უცხადებენ. სტუდენტების თქმით, უნივერსიტეტის განცხადება ორაზროვანი და ბუნდოვანია.
„ჩვენ, თეატრალური უნივერსიტეტის სტუდენტები კვირაზე მეტია ვიბრძვით უნივერსიტეტის ღირსეული განცხადებისთვის. უკვე ოთხი დღე–ღამეა ვიკავებთ ფოიეს. ადმინისტრაციამ ყველა პირობა შეგვიქმნა იმისთვის, რომ ფოიეში ჩვენი გაჩერება გაუსაძლისი გამხდარიყო. გუშინ უნივერსიტეტმა გამოაქვეყნა ორაზროვანი და ბუნდოვანი განცხადება, რომელიც ზუსტად ასახავს მათ პოზიციას და წარმოადგენს უნივერსიტეტის სახეს.
ჩვენ, თეატრალური უნივერსიტეტის სტუდენტური მოძრაობა სოლიდარულები ვართ რეჟიმის წინააღმდეგ ბრძოლაში დაშავებული თუ უკანონოდ დაკავებული ადამიანების მიმართ და ვითხოვთ მათ დაუყოვნებლივ გათავისუფლებას”.
სტუდენტები უნივერსიტეტის განცხადებას „სამარცხვინოს“ უწოდებენ და ამბობენ, რომ თეატრალური უნივერსიტეტი „საკუთარ სტუდენტს გვერდში არ დაუდგება და არ დაიცავს.“
„უნივერსიტეტი არასდროს აჟღერებდა და არც ახლა აჟღერებს სტუდენტების პოზიციას. ვემიჯნებით მათ მიერ გაკეთებულ სამარცხვინო განცხადებას. დღეს ქვეყანაში არსებული ვითარებიდან გამომდინარე ნებისმიერი ჩვენგანი შეიძლება საფრთხის წინაშე დადგეს, რომელიც გულისხმობს უკანონოდ, უსაფუძვლოდ, უსამართლოდ რეჟიმის მიერ დაკავებას. ეს არის უნივერსიტეტი რომელიც საკუთარ სტუდენტს გვერდში არ დაუდგება, არ დაიცავს და რეჟიმის ხელში უკიდურესი უსამართლობის წინააღმდეგ მარტო დატოვებს.
ჩვენი პროტესტი ყოველდღიურად ძლიერდება! ძალა სტუდენტების ერთობაშია!”, — წერია განცხადებაში.
შოთა რუსთაველის თეატრისა და კინოს სახელმწიფო უნივერსიტეტმა განცხადება 19 დეკემბერს მას შემდეგ გაავრცელა, რაც სტუდენტებმა 18 დეკემბერს უნივერსიტეტის პირველი კორპუსის ფოიე პროტესტის ნიშნად დაიკავეს და მოითხოვეს, რომ უნივერსიტეტს მათთან შეთანხმებით ანდრო ჭიჭინაძის და ყველა უკანონოდ დაკავებულისა და დაზარალებულის შესახებ სოლიდარობის განცხადება გაეკეთებინა.
