ურანის გამდიდრების საკითხი მოლაპარაკებებს არ ექვემდებარება, - ამის შესახებ ირანის საგარეო საქმეთა მინისტრმა, აბას არაღჩიმ განაცხადა.
აბას არაღჩი აშშ-ის პრეზიდენტის, დონალდ ტრამპის სპეციალური წარმომადგენლის, სტივ უიტკოფის განცხადებას გამოეხმაურა, რომლის თანახმადაც, თუ თეირანს ვაშინგტონთან შეთანხმების მიღწევა სურს, მაშინ მან ურანის გამდიდრება უნდა შეაჩეროს.
„ჩვენ უიტკოფისგან წინააღმდეგობრივი განცხადებები გვესმის, მაგრამ რეალური პოზიციები მოლაპარაკებების მაგიდასთან გახდება ნათელი. ჩვენ მზად ვართ, ნდობა აღვადგინოთ ირანის მიერ ურანის გამდიდრებასთან დაკავშირებულ შესაძლო შეშფოთებებთან დაკავშირებით, მაგრამ ურანის გამდიდრების საკითხი მოლაპარაკებებს არ ექვემდებარება“, - განაცხადა ირანის საგარეო საქმეთა მინისტრმა.
ცნობისთვის, აშშ-მა და ირანმა განაცხადეს, რომ 12 აპრილს ომანში გამართული მოლაპარაკებები კონსტრუქციული იყო. თეირანის ბირთვული პროგრამის შესახებ მოლაპარაკებების მეორე რაუნდი ომანში შაბათს, 19 აპრილს გაიმართება.
