ისრაელი ბინძურ სამუშაოს აკეთებს ყველა ჩვენგანისთვის. ამის შესახებ გერმანიის კანცლერმა, ფრიდრიხ მერცმა გერმანულ ტელეარხ ZDF-თან ინტერვიუში განაცხადა.
კერძოდ, ინტერვიუში მერცმა აღნიშნა, რომ ის მადლობელია ირანის წინააღმდეგ ისრაელი ქმედებებისთვის, რაც, მისი აღწერით, “ბინძური სამუშაოა, რომელსაც ისრაელი ყველა ჩვენგანისთვის აკეთებს”.
მერცის თქმით, გერმანია ასევე ზარალდება "მოლების რეჟიმით".
“ჩვენც ამ რეჟიმის მსხვერპლნი ვართ. ამ მოლების რეჟიმმა მსოფლიოს სიკვდილი და ნგრევა მოუტანა”, - აღნიშნა მერცმა.
მისი თქმით, თეირანის ლიდერებმა “სიკვდილი და განადგურება მოუტანეს მსოფლიოს თავისი თავდასხმებით, მკვლელობებითა და კაცთაკვლით, ჰეზბოლათი, ჰამასით”.
გერმანიის კანცლერმა აღნიშნა, რომ რადიკალური ისლამური “ჰამასის” 2023 წლის 7 ოქტომბრის ისრაელზე თავდასხმა “არასდროს გახდებოდა შესაძლებელი თეირანის რეჟიმის გარეშე”.
“მხოლოდ იმის თქმა შემიძლია, რომ უდიდესი პატივისცემა მაქვს იმ ფაქტისადმი, რომ ისრაელის არმიასა და ისრაელის მთავრობას ამის გაკეთების გამბედაობა ჰქონდა…
წინააღმდეგ შემთხვევაში, ამ რეჟიმის ტერორს თვეებისა და წლების განმავლობაში დავინახავდით - და მომავალში, შესაძლოა, ბირთვული იარაღით ხელში”, - განაცხადა მერცმა.
გერმანიის კანცლერის თქმით, ისრაელის არმიას ირანის ბირთვული იარაღის პროგრამის სრულად განადგურების შესაძლებლობა არ გააჩნია, “ვინაიდან, საჭირო იარაღი არ აქვთ, მაგრამ ამერიკელებს აქვთ”.
