საქართველოს ნაკრების საოცარი სერია გრძელდება – ერთა ლიგის მესამე ტურში ვილი სანიოლის გუნდი პრინციპულ მეტოქეს, ჩრდილოეთ მაკედონიას ესტუმრა და შესანიშნავი გამარჯვებით ქართველ გულშემატკივარს უდიდესი სიხარული მიანიჭა – „ჯვაროსნებმა“ უშუალო კონკურენტთან გაიმარჯვეს და ულამაზესი ფეხბურთით მეტოქეს მტკივნეული დარტყმა მიაყენეს.
საქართველოს ნაკრების სასტარტო შემადგენლობა
თამაში მასპინძელთა უპირატესობით დაიწყო, მაგრამ პირველი საგოლე შანსი ხვიჩა კვარაცხელიამ შექმნა – მე-11 წუთზე მეტოქის გადაცემა ჩაჭრა, მცველს გაცდა და კარში დაარტყა, მაგრამ მეკარემ ბურთი აიღო. მასპინძლებიდან პირველად სახიფათოდ მე-17 წუთზე ტრაიკოვსკიმ გაისროლა და მიზანს ააცილა.
31-ე წუთზე შორიდან უკვე დავითაშვილმა სცადა გატანა და მეკარემ ბურთი მოიგერია. ერთ წუთში მასპინძელთა ერთ-ერთმა გამორჩეულმა მოთამაშემ, ელმასმა შეგვიტია და მამარდაშვილმა პოზიცია ზუსტად შეარჩია. ჩვენი გუნდის კონტრშეტევაზე კარგი შანსი ჰქონდა დავითაშვილს, მაგრამ დააყოვნა და მცველმა ვითარება განმუხტა. ამას ისევ ელმასის დარტყმა მოჰყვა და მამარდაშვილმა საიმედოდ ითამაშა. ტაიმის ბოლოს უკვე ზივზივაძემ სცადა ბედი, მაგრამ მეკარე ბურთს ისევ ადგილზე დაუხვდა და ტაიმი უგოლოდ დასრულდა – 0:0.
II ტაიმი
მეორე ნახევარიც მასპინძელთა აქტიურობით დაიწყო. ბარდიმ საჯარიმოდან სახიფათოდ გაისროლა, თუმცა მამარდაშვილი ბურთს ადგილზე დახვდა. კვარაცხელიას მოწოდებული კუთხურის შემდეგ ხოჭოლავამ დაარტყა და კარს სანტიმეტრებში ააცილა. 52-ე წუთზე სწრაფი კონტრშეტევა წიტაიშვილმა განახორციელა, კარის წინ ზივზივაძე მოძებნა, რომელმაც შანსი გოლად აქცია – 0:1 და ტრიბუნაზე მსხდომი ქართველი გულშემატკივბრების ხმა კიდევ უფრო ომახიანად აგუგუნდა.
გავიდა ერთი წუთი და წიტაიშვილმა საჯარიმოში უკვე დავითაშვილი მონახა, რომელსაც ჩვენი უპირატესობის გაზრდა შეეძლო, მაგრამ ახლოდან თავით ააცილა. თუმცა 62-ე წუთზე მასპინძელთა კარი მეორედ ხვიჩა კვარაცხელიამ აიღო. ხვიჩამ საჯარიმოსთან ჩურლინოვს თავბრუ დაახვია და ძლიერად დაარტყა – მეკარე ბურთს შეწვდა, მაგრამ ვერ შეაჩერა, ძელიდან კი კარის ბადე შეარხია და საქართველოს გულშემატკივარმა უზომოდ გაიხარა – 0:2.
კვარაცხელიამ საქართველოს ნაკრების უპირატესობა სოლიდური გახადა. ჩრდილოეთმაკედონიელები უკვე მთელი ძალით შეეცადნენ შეტევას. ამას ჩვენების მორიგი კონტრშეტევა და კაკაბაძის არაზუსტი დარტყმა მოჰყვა, არადა, გატანა კიდევ შეგვეძლო. გავიტანეთ მესამე გოლიც, მაგრამ თამაშგარედან და კვარაცხელია-ზივზივაძის შედეგიანი შეტევა არ ჩაგვეთვალა.
გაღიზიანებულმა მასპინძლებმა ჩხუბი დაიწყეს, რის გამოც ბარდი და კვირკველია გააფრთხილეს, მაგრამ ინციდენტი მალე ამოიწურა. 84-ე წუთზე კი საქართელომ ამ მშვენიერ თამაშს მესამე გოლიც მოაყოლა – კვეკევსკირის შესრულებული ჯარიმის შემდეგ, საჯარიმოში კიტეიშილი გაიხსნა და ზუსტად დაარტყა – 0:3.
მეოთხე გოლის გატანა კონტრშეტევაზე ლობჟანიძეს შეეძლო, მაგრამ დაახანა და მომენტი ვერ გამოიყენა. თუმცა ამით ბევრი არაფერი შეცვლილა. საბოლოოდ, საქართველოს ნაკრებმა შესანიშნავი გამარჯვება მოიპოვა, ასპროცენტიანი შედეგით ( 9 ქულა) დააგროვა და უშუალო კონკურენტს, ჩრდილოეთ მაკედონიას 5 ქულით ვასწრებთ. გუნდმა ბოლო 3 მატჩში 12 გოლი გაიტანა (საშუალოდ 4 გოლი მატჩში) და რაც მთავარია, ორივე უშუალო კონკურენტი ჩრდილოეთ მაკედონია და ბულგარეთი გასვლაზე დავამარცხეთ.
შემდეგ შეხვედრას ჩვენი ეროვნული გუნდი 12 ივნისს „დინამო არენაზე“ ბულგარეთთან გამართავს და თუ მოიგო, ფაქტობრივად, ჯგუფში პირველ ადგილს გაინაღდებს.
გოლები: 0:1 ზივზივაძე (52. წიტაიშვილის პაისთ), 0:2 კვარაცხელია (62), 0:3 კიტეიშვილი (84. კვეკვესკირის პასით)
ერთა ლიგა 2022/23. C4 ლიგა. III ტური
09.06.2022. სკოპიე. სტადიონი„ტოდორ პროესკი“.
ჩრდ. მაკედონია: დიმიტრიევსკი – აშკოვსკი, ველკოვსკი, მუსლიუ, ალიოსკი – სპიროვსკი (71. მიოვსკი), ბარდი – ჩურლინოვი, ელმასი (78. ტოდოროსკი), ტრაიკოვსკი (60. ნიკოლოვი) – მ. რისტოვსკი (71. ბაბუნსკი)
მთავარი მწვრთნელი: ბლაგოი მილევსკი
საქართველო: მამარდაშვილი – კაშია, კვირკველია, ხოჭოლავა- კაკაბაძე (83. ლობჟანიძე), აბურჯანია (61. კიტეიშვილი), კვეკვესკირი, წიტაიშვილი – დავითაშვილი (72. მამუჩაშვილი), ზივზივაძე (72. მიქაუტაძე), კვარაცხელია (83. ყაზაიშვილი)
სათადარიგოები: ლორია, კუპატაძე, ლოჩოშვილი, კობახიძე, აზაროვი, გვილია, მექვაბიშვილი
მთავარი მწვრთნელი: ვილი სანიოლი
მთავარი არბიტრი: როი რაინშრაიბერი (ისრაელი)
გაფრთხილებები: კაკაბაძე (21), ველკოვსკი (38), ზივზივაძე (45), ბარდი (73), კვირკველია (73), ბ აბუნსკი (82)
იხილეთ გატანილი გოლები ბმულებზე
1tv.ge
გოჩა მირცხულავა პოლიტიკური კრიზისის დასაძლევად „საქართველოს ეროვნული შეთანხმების აქტის“ პროექტს აქვე
გოჩა მირცხულავა: მოკალი ქრისტე - როდესაც ვიცით, რას ვიქმთ ანუ ქართული პოლიტიკისა და საზოგადოების სულ
გოჩა მირცხულავა - ავტორიტარიზმის პირველი მსხვერპლი თავისუფლება კი არ არის - პირველი მსხვერპლი ემპათი
გოჩა მირცხულავა: საქართველოს საპატრიარქო, თუ თავს შეიკავებს განცხადების გაკეთებისგან, ეს იქნება დიდი
გოჩა მირცხულავა: ეპისკოპოსებს თუ არ სურთ, რომ ხელისუფლების ინსტრუმენტები გახდნენ, მაშინ დამოუკიდებელ
გოჩა მირცხულავა: ოპოზიციიდან ზოგმა ივანიშვილთან პირდაპირ ითანამშრომლა, ზოგმა კი თავისი სასარგებლო იდ
