საერთაშორისო სავალუტო ფონდმა ახალი კვლევა გამოაქვეყნა და ეროვნული ბანკის საქმიანობა დადებითად შეაფასა. ინფორმაციას საქართველოს ეროვნული ბანკი ავრცელებს.
როგორც ინფორმაციაშია აღნიშნული, დოკუმენტი კავკასიისა და ცენტრალური აზიის რეგიონის ქვეყნებში მონეტარული პოლიტიკის ჩარჩოს გაძლიერებას ეხება.
„კვლევაში განხილულია ის გლობალური გამოწვევები, რომლებიც რეგიონის ქვეყნების ინფლაციის მაჩვენებელზე, Covid-19 პანდემიისა და რუსეთის მიერ უკრაინაში შეჭრის შედეგად, მოქმედებს. თუმცა, რეგიონის ქვეყნებმა მონეტარული პოლიტიკის შედეგად ამ გამოწვევებს წარმატებით გაართვეს თავი. კვლევაში დეტალურად განხილულია ცენტრალური ბანკების მიერ მონეტარული პოლიტიკის ჩარჩოს მოდერნიზების მიმართულებით გადადგმული ნაბიჯები. აღსანიშნავია, რომ საქართველო, კავკასიისა და ცენტრალური აზიის ქვეყნებს შორის, მონეტარული პოლიტიკის ჩარჩოს მოდერნიზების კუთხით მოწინავე პოზიციას იკავებს.
ცენტრალურმა ბანკებმა უნდა შეიმუშაონ მომავალზე ორიენტირებული სტრატეგია, რომელიც ფასების სტაბილურობის მიზანს აკავშირებს პოლიტიკის გადაწყვეტილებებთან. ეს მოითხოვს გამართულ პროგნოზირებისა და მონეტარული პოლიტიკის ანალიზის სისტემას (Forecasting and Policy Analysis System – FPAS). კავკასიისა და ცენტრალური აზიის ზოგიერთი ქვეყნის (სომხეთი, საქართველო, ყაზახეთი) ცენტრალურმა ბანკებმა აღნიშნული სისტემის (FPAS) დანერგვაში მნიშვნელოვან პროგრესს მიაღწიეს“, – აღნიშნულია დოკუმენტში.
„ჩვენი მთავარი მანდატი ფასების სტაბილურობის უზრუნველყოფაა და ამ მიზნის მისაღწევად, მოგეხსენებათ, რომ ეროვნული ბანკი მონეტარულ პოლიტიკას წარმართავს. ძალიან სასიხარულოა, რომ სსფ-ის უახლესი კვლევის თანახმად, მონეტარული პოლიტიკის ჩარჩოს მოდერნიზების კუთხით, საქართველო მოწინავე პოზიციას იკავებს კავკასიასა და ცენტრალურ აზიაში. ეს სწორედ ჩვენი პროფესიონალი გუნდის დამსახურებაა, მსურს, მათ მადლობა გადავუხადო“, – განაცხადა ნათია თურნავამ.
სსფ-ის შუა აღმოსავლეთისა და ცენტრალური აზიის დეპარტამენტის უფროსმა, ჯიჰად აზურმა კვლევა სომხეთის ეროვნული ვალუტის, დრამის 30 წლის საიუბილეო ღონისძიებაზე წარადგინა.
