კარაფანო: აშშ საქართველოსთან თანამშრომლობას მზადაა, თუმცა ურთიერთობების გაღრმავებისთვის კონკრეტულ შედეგებს ელოდება

აშშ-ის საგარეო პოლიტიკის საკითხებში Heritage Foundation-ის წამყვანი ექსპერტის, ჯეიმს კარაფანოს განცხადებით, ვაშინგტონი საქართველოს მნიშვნელოვან პარტნიორად მიიჩნევს, თუმცა ორმხრივი ურთიერთობების განვითარება მხოლოდ განცხადებებით ვერ მოხდება და კონკრეტულ შედეგებს მოითხოვს.

Independence TV Media-სთვის მიცემულ ინტერვიუში კარაფანომ აღნიშნა, რომ შეერთებული შტატები დაინტერესებულია შუა დერეფნის განვითარებით, შავი ზღვის უსაფრთხოებითა და რეგიონული თანამშრომლობის გაძლიერებით, სადაც საქართველოს მნიშვნელოვანი როლი აკისრია. მისი თქმით, ვაშინგტონი მზად არის იმუშაოს მოქმედ ხელისუფლებასთან, თუმცა პარტნიორობის გაღრმავება რეალური ნაბიჯების გარეშე შეუძლებელია.

კარაფანოს შეფასებით, საქართველოს მთავრობამ უნდა გადაწყვიტოს, სურს თუ არა აშშ-სთან სტრატეგიული თანამშრომლობის გაძლიერება იმ მოდელით, როგორც ამას სომხეთი, აზერბაიჯანი და სერბეთი აკეთებენ. მისი თქმით, აშშ საქართველოსგან ელოდება უფრო აქტიურ ჩართულობას რეგიონულ პროექტებში და ისეთ გადაწყვეტილებებს, რომლებიც ქვეყნის უსაფრთხოებასა და ეკონომიკურ განვითარებას შეუწყობს ხელს.

ინტერვიუს ავტორია კახა შარაშანიძე, წყარო – Independence TV Media.