უკრაინის შეიარაღებული ძალების გენერალური შტაბის ინფორმაციით, უკრაინულმა ძალებმა რუსეთის ორენბურგის ოლქში მდებარე სტრატეგიული მნიშვნელობის ობიექტებზე იერიში მიიტანეს, რომლებიც ფრონტის ხაზიდან 1200 კილომეტრზე მეტ მანძილზე მდებარეობს.
გენშტაბის ცნობით, დარტყმის სამიზნე ორენბურგის გაზის გადამამუშავებელი ქარხანა და რუსეთის ერთადერთი ჰელიუმის ქარხანა გახდა. უწყების ინფორმაციით, ორივე საწარმოს ტერიტორიაზე ხანძარი გაჩნდა, ხოლო მიყენებული ზარალის მასშტაბი ამ ეტაპზე ზუსტდება.
უკრაინული მხარის განმარტებით, აღნიშნული საწარმოები ერთ ინდუსტრიულ კომპლექსს წარმოადგენენ. ორენბურგის გაზის გადამამუშავებელი ქარხანა წელიწადში 45 მილიარდ კუბურ მეტრამდე ბუნებრივ აირს ამუშავებს და, გაწმენდილი გაზის გარდა, გოგირდსაც აწარმოებს, რომელიც სხვადასხვა სამხედრო დანიშნულების პროდუქციის წარმოებაში გამოიყენება.
რაც შეეხება ჰელიუმის ქარხანას, იქ იწარმოება ჰელიუმი და ეთანი. ჰელიუმი გამოიყენება მათ შორის სარაკეტო ტექნოლოგიებსა და მართვის სისტემებში.
რუსულ მხარეს თავდასხმის შედეგების შესახებ დეტალური ინფორმაცია ამ დრომდე არ გაუვრცელებია.
