აშშ-ის სპეციალური დანიშნულების ძალებმა სამხედრო წვრთნების ფარგლებში პირველად გამოიყენეს უკრაინული წარმოების Magura-ს ტიპის საზღვაო დრონები. ინფორმაციას Bloomberg ავრცელებს.
გამოცემის ცნობით, გამოცდა ფილიპინებში ჩატარდა, სადაც უპილოტო საზღვაო აპარატმა მწყობრიდან გამოსულ გემს დაარტყა და ჩაძირა.
Bloomberg-ის ინფორმაციით, ამერიკელი სამხედროები საზღვაო დრონებს ინდოეთისა და წყნარი ოკეანის რეგიონებში დიდი სამხედრო გემების წინააღმდეგ საბრძოლველად შედარებით იაფი და ეფექტიანი საშუალებების შესამუშავებლად სწავლობენ. გამოცემა აღნიშნავს, რომ ეს გამოცდილება შესაძლოა მნიშვნელოვანი იყოს ტაივანთან დაკავშირებული პოტენციური კრიზისის შემთხვევაშიც.
Magura-ს ტიპის დრონების მიმართ ინტერესს ზრდის მათი წარმატებული გამოყენება რუსეთის შავი ზღვის ფლოტის წინააღმდეგ მიმდინარე ომის დროს.
