გარემოს ეროვნული სააგენტოს ინფორმაციით, ამ დრომდე ჩატარებული ლაბორატორიული კვლევების მიხედვით, შავი ზღვის წყლის ხარისხი საქართველოს სანაპიროს მთელ პერიმეტრზე დადგენილ ნორმებს შეესაბამება.
სააგენტოს განმარტებით, შავი ზღვის წყლის ხარისხის მონიტორინგი უწყვეტ რეჟიმში, ყოველთვიურად, საქართველოს სანაპირო ზოლის 12 საკონტროლო წერტილში ტარდება.
აღებული სინჯები გარემოს ეროვნული სააგენტოს ატმოსფერული ჰაერის, წყლისა და ნიადაგის ანალიზის აკრედიტებულ ლაბორატორიაში მოწმდება, რომელიც თანამედროვე, მაღალი სიზუსტის აპარატურით არის აღჭურვილი.
კვლევები მოიცავს ჰიდრობიოლოგიურ და ქიმიურ პარამეტრებს, მათ შორის 13 მძიმე მეტალს, ნავთობის ჯამურ ნახშირწყალბადებს, 16 პოლიარომატულ ნახშირწყალბადს და სხვა ფიზიკურ-ქიმიური მაჩვენებლების კონცენტრაციას.
გარემოს ეროვნული სააგენტოს განცხადებით, ჩატარებული ლაბორატორიული კვლევების შედეგებით, საქართველოს სანაპირო ზოლზე შავი ზღვის წყლის ხარისხი ნორმის ფარგლებშია.
ამასთან, სააგენტოში აცხადებენ, რომ ევროკავშირის საზღვაო სტრატეგიის ჩარჩო დირექტივის შესაბამისად, შავი ზღვის მონიტორინგის სისტემის გაუმჯობესებაზე მუშაობა აქტიურად გრძელდება.
გარემოს ეროვნული სააგენტოს მიერ ჩატარებული კვლევების შედეგები სააგენტოს ოფიციალურ ვებგვერდზე ქვეყნდება.
