თელავში სტიქიის სალიკვიდაციო სამუშაოები უწყვეტ რეჟიმში გრძელდება. ამ დროისთვის ქვა-ღორღისგან გაწმენდილია კავკასიონის ქუჩის ძირითადი ნაწილი, ასევე დასრულებულია დაზიანებული ხიდის ნარჩენების დემონტაჟი.
სამაშველო და გაწმენდით სამუშაოებში კახეთის რეგიონის რვავე მუნიციპალიტეტია ჩართული. ადგილზე მობილიზებულია როგორც მძიმე ტექნიკა, ისე ცოცხალი ძალა, რომელიც იმ მონაკვეთებს ასუფთავებს, სადაც ტექნიკის მუშაობა შეუძლებელია.
სტიქიის ზონაში მცხოვრებ მოსახლეობას ელექტროენერგია ამ დრომდე არ მიეწოდება, თუმცა ბუნებრივი აირის მიწოდება უმეტეს ტერიტორიაზე უკვე აღდგენილია.
ამასთან, გარემოს ეროვნული სააგენტოს პირველადი შეფასებით, თელავის მუნიციპალიტეტში მოსულმა უხვმა ატმოსფერულმა ნალექმა მდინარე თელავისხევის აუზში ღვარცოფული პროცესების მკვეთრი გააქტიურება გამოიწვია.
სააგენტოს ინფორმაციით, 12 ივლისს, გამთენიისას, ქალაქ თელავში მოსული უხვი ნალექის შედეგად მდინარე თელავისხევმა კალაპოტი გაარღვია, რის შემდეგაც ღვარცოფულმა ნაკადმა ქალაქის რამდენიმე ქუჩა დატბორა.
გარემოს ეროვნული სააგენტოს მონაცემებით, თელავის მეტეოროლოგიურ სადგურზე ნალექის რაოდენობამ 57.3 მმ შეადგინა, რაც თვის ნორმის 85%-ს უდრის, ხოლო იყალთოში 40.1 მმ დაფიქსირდა.
სააგენტოს განმარტებით, მყარი ნატანისა და წყლის კრიტიკულმა მასამ ძლიერი ღვარცოფული ნაკადი წარმოქმნა. მიუხედავად იმისა, რომ მდინარის შუა წელში განთავსებულმა სამმა ღვარცოფდამჭერმა ნაგებობამ ნაკადის ნაწილი შეაკავა, ღვარცოფის დიდმა მოცულობამ და ენერგიამ ნაგებობებს გვერდი აუარა, დააზიანა ნაპირდამცავი კონსტრუქციები და გზის ცალკეული მონაკვეთები.
ქალაქის ტერიტორიაზე მდინარის კალაპოტმა ღვარცოფული ნაკადის სრულად გატარება ვერ შეძლო, რის გამოც ნაკადი მიმდებარე ქუჩებზე გადავიდა. ღვარცოფული მასის ძირითადი აკუმულირება ქალაქის ქვედა ნაწილში, ინფრასტრუქტურული ობიექტების მიმდებარედ დაფიქსირდა.
გარემოს ეროვნული სააგენტოს სპეციალისტები ადგილზე რჩებიან და სტიქიის ზონის დეტალურ შესწავლას აგრძელებენ.
ცნობისთვის, უხვი ნალექის შედეგად ადიდებულმა თელავისხევმა კალაპოტი გაარღვია, რის გამოც დაიტბორა კავკასიონის ქუჩისა და ალაზნის გამზირის ნაწილი.
