რუსეთის ბაშკირეთის რესპუბლიკაში, უკრაინის საზღვრიდან დაახლოებით 1400 კილომეტრში მდებარე „გაზპრომ ნეფტეხიმ სალავატის“ ნავთობგადამამუშავებელ ქარხანაზე დრონით თავდასხმის შედეგად ხანძარი გაჩნდა, - ინფორმაციას უკრაინული მედია „ტელეგრამ“ არხებზე დაყრდნობით ავრცელებს.
გავრცელებული ინფორმაციით, „გაზპრომ ნეფტეხიმ სალავატი“ რუსეთის ერთ-ერთი უდიდესი ნავთობგადამამუშავებელი ქარხანაა, რომელიც წელიწადში დაახლოებით 10 მილიონ ტონა ნავთობს ამუშავებს.
ამასთან, უკრაინული მედიის ცნობით, აფეთქებების ხმები ისმოდა რუსეთის კრასნოდარის მხარის ქალაქ გელენჯიკშიც. აფეთქებების შემდეგ აეროპორტის მიმდებარე ტერიტორიაზე მასშტაბური ხანძარი გაჩნდა.
ოფიციალურ უწყებებს თავდასხმების შედეგებთან დაკავშირებით ინფორმაცია, ჯერჯერობით, არ გაუვრცელებიათ.
