უკრაინის პრეზიდენტმა ვოლოდიმირ ზელენსკიმ დაადასტურა, რომ უკრაინამ რუსეთის ბაშკირეთის რესპუბლიკაში მდებარე „გაზპრომის“ ნავთობგადამამუშავებელ ქარხანაზე დარტყმა განახორციელა.
„ჩვენი მეომრები შორ მანძილზე მოქმედი „სანქციების“ დაწესებას აგრძელებენ იმ რუსულ საწარმოებსა და ობიექტებზე, რომლებიც ომს აფინანსებენ. ბაშკირეთში, ფრონტის ხაზიდან დაახლოებით 1300 კილომეტრში ნავთობგადამამუშავებელ ქარხანაზე დარტყმა განხორციელდა“, – წერს ზელენსკი X-ზე.
მისივე ინფორმაციით, უკრაინის უპილოტო სისტემების ძალებმა ასევე შეუტიეს კრასნოდარის მხარეში მდებარე აფიპსკის ნავთობგადამამუშავებელ ქარხანას, რომელიც ფრონტის ხაზიდან დაახლოებით 400 კილომეტრში მდებარეობს.
ზელენსკის განცხადებით, შედეგს იძლევა საშუალო მანძილზე განხორციელებული დარტყმებიც.
„გელენჯიკში, ფრონტის ხაზიდან დაახლოებით 430 კილომეტრში, უკრაინის სამხედრო-საზღვაო ძალებმა საპატრულო გემსა და „ჩრდილოვანი ფლოტის“ ტანკერს დაარტყეს. ასევე, აზოვის ზღვაში „ჩრდილოვანი ფლოტის“ სამ ტანკერზე წარმატებული დარტყმები განხორციელდა. მადლობას ვუხდი ჩვენს მეომრებს, რომელთა წარმატებული ოპერაციებით ომი იქ ბრუნდება, საიდანაც მოვიდა“, – განაცხადა უკრაინის პრეზიდენტმა.
