საქართველოში ნარკოტიკების შემოტანის საქმეზე ბრიტანეთის მოქალაქეს საპროცესო შეთანხმება გაუფორმდა

ბრიტანეთის მოქალაქეს, მეთიუ როი დესმონდს, რომელსაც საქართველოში დიდი ოდენობით ნარკოტიკული საშუალებებისა და ფსიქოტროპული ნივთიერებების შემოტანას ედავებოდნენ, საპროცესო შეთანხმება გაუფორმდა.

თბილისის საქალაქო სასამართლოს მოსამართლემ ნინო გალუსტაშვილმა დესმონდი დამნაშავედ ცნო, 100 000 ლარის ჯარიმა დააკისრა, საქართველოდან გაძევება მიუსაჯა და ქვეყანაში 20 წლით შემოსვლა აუკრძალა.

სასამართლო დარბაზიდან გათავისუფლების შემდეგ დესმონდი იმავე დარბაზში საიმიგრაციო სამსახურის თანამშრომლებს გადაეცა.

ცნობისთვის, ოფიციალური ინფორმაციით, ბრიტანეთის მოქალაქის ხელბარგში საბაჟო სამსახურის თანამშრომლებმა აღმოაჩინეს:

• 112 აბი ბუპრენორფინის (სუბოტექსი) შემცველი ნარკოტიკული საშუალება (სულ 0,0224 გრამი);
• 50 აბი კოდეინის შემცველი ნარკოტიკული საშუალება (სულ 0,75 გრამი);
• 39 კაფსულა პრეგაბალინის შემცველი ფსიქოტროპული ნივთიერება (სულ 5,8484 გრამი).

პროკურატურის ინფორმაციით, დაკავების დროს მეთიუ როი დესმონდს არ წარუდგენია სამედიცინო დოკუმენტაცია, რომელიც დაადასტურებდა, რომ აღნიშნული ნარკოტიკული და ფსიქოტროპული პრეპარატები ექიმის დანიშნულებით ჰქონდა.