უკრაინის პრეზიდენტმა ვოლოდიმირ ზელენსკიმ უკრაინის უსაფრთხოების სამსახურის დროებით მოვალეობის შემსრულებელს, ევგენი ხმარას, თავდაცვის მინისტრის მოვალეობის შესრულება დაავალა. ამის შესახებ ზელენსკი სოციალურ ქსელში წერს.
პრეზიდენტის განცხადებით, ხმარამ უნდა გააგრძელოს თავდაცვის სფეროს რეფორმა და უზრუნველყოს იმ მიზნების შესრულება, რომლებიც უკრაინის თავდაცვის გაძლიერებას უკავშირდება.
„დავავალე ევგენი ხმარას შეასრულოს [თავდაცვის] მინისტრის მოვალეობები, გააგრძელოს თავდაცვის სფეროს რეფორმირება და უზრუნველყოს უკრაინისთვის ყველა ის შედეგი, რომელზეც ვისაუბრეთ. მას შემდეგ, რაც ყველა შესაბამისი იურიდიული პროცედურა იქნება დაცული, მივმართავ დეპუტატებს თხოვნით, მხარი დაუჭირონ ევგენი ხმარას კანდიდატურას უკრაინის თავდაცვის მინისტრის თანამდებობაზე“, – წერს ზელენსკი.
უკრაინის პრეზიდენტის თქმით, ხმარასთან შეხვედრისას განიხილეს ქვეყნის თავდაცვის სფეროს სტრატეგიული მიმართულებები და სამომავლო ნაბიჯები.
ზელენსკის განცხადებით, ევგენი ხმარამ მნიშვნელოვანი გამოცდილება დააგროვა ტექნოლოგიური დარტყმითი ოპერაციების დაგეგმვასა და განხორციელებაში და სწორედ ამ შესაძლებლობების განვითარებაზე უნდა იყოს ორიენტირებული უკრაინის თავდაცვის სისტემა მიმდინარე ომის პირობებში.
