Amnesty International საქართველოში საპროტესტო აქციების დროს დაკავებული ცხრა პირის შეწყალებას ეხმაურება და აცხადებს, რომ მათი გათავისუფლება მისასალმებელია, თუმცა „ეს მართლმსაჯულებას არ წარმოადგენს“.
ორგანიზაციის აღმოსავლეთ ევროპისა და ცენტრალური აზიის დირექტორის მოადგილის, დენის კრივოშეევის განცხადებით, მშვიდობიანი დემონსტრანტები მხოლოდ შეკრებისა და გამოხატვის თავისუფლების უფლების გამოყენების გამო დევნის ობიექტები საერთოდ არ უნდა გამხდარიყვნენ.
„ცხრა დემონსტრანტის გათავისუფლება სასიხარულოა მათთვის და მათი ოჯახებისთვის და ეს მისასალმებელია, თუმცა მართლმსაჯულება არ არის. მშვიდობიანი დემონსტრანტები, რომლებიც საქართველოს მთავრობის წინააღმდეგ გამოსვლის გამო სამიზნეები გახდნენ, საერთოდ არ უნდა გამხდარიყვნენ დევნის ობიექტები მხოლოდ მშვიდობიანი შეკრებისა და გამოხატვის თავისუფლების უფლებების გამოყენების გამო“, — აცხადებს კრივოშეევი.
Amnesty International ასევე ყურადღებას ამახვილებს სამართალდამცავი ორგანოების წარმომადგენლების შესაძლო პასუხისმგებლობაზე და აცხადებს, რომ არანაკლებ მნიშვნელოვანია პოლიციისა და სხვა ძალოვანი სტრუქტურების თანამშრომლების მიერ ადამიანის უფლებების შესაძლო დარღვევების ეფექტიანი გამოძიება.
ორგანიზაცია საქართველოს ხელისუფლებას მოუწოდებს, შეწყვიტოს დემონსტრანტების წინააღმდეგ სისხლისსამართლებრივი და ადმინისტრაციული სამართალწარმოების ბოროტად გამოყენება და უზრუნველყოს სამართალდამცველების მხრიდან ძალის უკანონო გამოყენების, არასათანადო მოპყრობისა და უფლებამოსილების შესაძლო ბოროტად გამოყენების შემთხვევების დამოუკიდებელი და ეფექტიანი გამოძიება.
„ყველა პირი, რომელიც დაკავებულია მხოლოდ შეკრებისა და გამოხატვის თავისუფლების უფლებების გამოყენებისთვის, დაუყოვნებლივ და უპირობოდ უნდა გათავისუფლდეს“, — ნათქვამია განცხადებაში.
საქართველოს პრეზიდენტმა მიხეილ ყაველაშვილმა მარიამობის დღესასწაულთან დაკავშირებით 226 პირი შეიწყალა. მათ შორის არიან 4 ოქტომბრის საქმეზე დაკავებული ავთანდილ თოფჩიშვილი და თორნიკე მჭედლიშვილი, ასევე საპროტესტო აქციების დროს დაკავებული ფრიდონ ბუბუტეიშვილი, დავით ხომერიკი, სიმონ მახარაძე, საბა ჯიქია, გურამ ხუტაშვილი, დანიელ მუმლაძე და დენის კულანინი.
